Инстульт кэннэ чөлүгэр түһэрии киинин саҥа дьиэтин сыбаайата түстэ

33

Өрөспүүбүлүкэтээҕи 3№-дээх клиническэй балыыһа чөлүгэр түһэрэр киинигэр салҕааһыны тутуохтара. Сыбаайаны түһэрии үөрүүлээх тэрээһинэ буолла.

Бастакы сыбаайа түһүүтэ - саҥа тутуу саҕаланыытын туоһута. Хас да сыллаах туруорсуу кэннэ, дьэ 3 мэндиэмэннээх эбии тутууну саҕалаатылар. Эргэ дьиэни кытары сыста турар буолуоҕа уонна саамай сүрүнэ дьон үөһэ-аллара тахсарыгар-түһэригэр табыгастаах буоларыгар аныгы лифтары туруоруохтара.

Наталья Дмитриева, Өрөспүүбүлүкэтээҕи 3№-дээх клиническэй балыыһа чөлүгэр түһэрии киинин сэбиэдиссэйэ: "Биһиги 3 мэндиэмэннээх дьиэбит эһиил үлэҕэ киирбитэ 35 сыла буолар. Ол сыллар тухары ыарыһахтары, лифт суоҕун иһин, үлэһиттэр эт илиилэринэн көтөҕөн кэллилэр. Салҕыы тутуу лифтаах буолуохтаах, онон коллектив үөрүүбүт улахан".

Балыыһа үлэлиир хайысхата киэҥ. Ол курдук инсульт, инфаркт уонна коронавирус курдук ыарыыларынан ыалдьыбыт дьоҥҥо чөлүгэр түһэллэригэр көмөлөһөллөр. Ону таһынан араас сүрэх-тымыр, төбө ыарыытын  эмтииллэр.

Анна Макарова, Өрөспүүбүлүкэтээҕи 3№-дээх клиническэй балыыһа чөлүгэр түһэрии киинин киин ниэрбэ систиэмэтин уонна инсульт ыарыытын кэннэ чөлүгэр түһэрии салаатын сэбиэдиссэйэ: "Салаабыт 30 куойкалаах. Манна инсульт кэннэ уонна улахан төбө, сүнньү эчэйиитин кэннэ киирэн чөлүгэр түһэриини ааһаллар. Биһиги ыарыһахтарбыт бары сытар ыарыһахтар, онон сыһыарыы тутууга лифт баар буоларын хайаан да туруорсубуппут".

Ыарыһаҕы чөлүгэр түһэриигэ анаан эмтиир физкультура кабинеттара итиэннэ араас тренажердар бааллар. Бу барыта дьон эмтэнэн инникитин курдук дьиэлэригэр-уоттарыгар төннөллөрүгэр туһуланар.

Инфаркт уонна сүрэххэ эпэрээссийэ кэннэ эмтэнэр салаа 3 этээскэ баар, онон ыарыһахтары киллэрии-таһаарыы куруутун ыарахаттардаах буолара. Үлэһиттэр үһүс этээскэ диэри ыарыһахтары көтөҕөн таһаараллар.

Туяра Ощепкова - Өрөспүүбүлүкэтээҕи 3№-дээх клиническэй балыыһа чөлүгэр түһэрии киинин инфаркт уонна сүрэх ыарыытын кэннэ чөлүгэр түһэрии салаа сэбиэдиссэйэ: "Биһиги салаабыт 3 этээскэ, онон инсультаабыт, улаханнык ойоҕостоппут дьон үөһэ тахсаллара ыарахаттардаах. Онон бүгүн лифт бастакы сыбаайата түһүүтэ биһиэхэ олус үөрүүлээх".

Саҥа тутууну номнуо бу сыл сэтинньи ыйыгар бүтэрэр былааннаахтар. Онон балыыһа үлэһиттэрэ да, ыарыһахтар даҕаны сүргэлэрэ көтөҕүллэн сылдьаллар