Нэһилиэнньэҕэ куттал суох буолуутун хааччыйар судаарыстыбаннай кэмитиэт бирииһигэр хапсаҕай буолла

Дьокуускайга нэһилиэнньэҕэ куттал суох буолуутун хааччыйар судаарыстыбаннай кэмитиэт бирииһигэр хапсаҕай буолла. Күрэхтэһии быйыл 4-с төгүлүн ыытылынна уонна аан бастакытын регионнар икки ардыларынааҕы таһымҥа таҕыста. Уопсайа 400 кэриҥэ бөҕөс бастыыр иһин кииристэ.

"Өрөгөй" спорт киинигэр хапсаҕай түһүлгэтэ күүстээхтэн күүстээхтэри, сымсалары түмтэ. Уопсайа 10 ыйааһыҥҥа беҕөстөр кииристилэр. Маны тэҥэ 75 киилэҕэ уонна 75 үөһээ ыйааһыҥҥа муҥутуур кыайыылааҕы быһаардылар. Нам бөҕөһө Игорь Софронеев былырыыҥҥы күрэхтэһии муҥутуур кыайыылааҕа. Быйыл эмиэ ситиһиилээхтик кытынна.

Игорь Софронеев, күрэхтэһии кыттыылааҕа: "Күрэх таһыма үрдүк, онон сыл устата буолар хапсаҕай күрэхтэригэр бастакы улахан  киирсиибитин манна ааһабыт. Турнирга бөҕөстөр бэлэмнэрэ сыаналанар, бастакы сылыктааһыннар оҥоһуллаллар".

Нэһилиэнньэҕэ куттал суох буолуутун хааччыйар кэмитиэт бирииһигэр хапсаҕай күрэҕэ быйыл 4-с төгүлүн ыытылынна. Уонна аан бастакытын регионнар икки ардыларынааҕы таһымнаах буолла. Ол курдук, 10 тахса регионтан спортсменнар кэллилэр. Онон, кырдьык да, бу хапсаҕайга  бастыҥнар кииристилэр.

Дмитрий Садовников, СӨ Бырабыыталыстыбатын Бэрэссэдээтэлин солбуйааччы: "Күрэхтэһии иитинэн конференция ыытылынна, туһааннаах эйгэҕэ уопут атастыһыыта барда. Турнир таһыма үрдээн кыттааччы ахсаана сыллата эбиллэр".

Тустаах турнирга идэтийбит спортсменнары таһынан, ыксаллаах быһыы-майгы министиэристибэтин үлэһиттэрэ, быыһааччылар, баһаарынайдар кытталлар. Бу күрэхтэһии сүрүн уратыта. Манна даҕатан эттэххэ, ыксаллаах быһыы-майгы сулууспаларын үлэһиттэрэ эт-хаан өттүнэн өрүү үрдүк бэлэмнээх буолаллара ирдэнэр. 

Иннокентий Андросов: СӨ нэһилиэнньэҕэ куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы:  "Биһиги үлэһиттэрбит эт-хаан өттүнэн дэгиттэр дуолуохтаахтар, онуоха бу турнир исписэлиистэр бэлэмнэрин тургутар".

Нэһилиэнньэҕэ куттал суох буолуутун хааччыйар судаарыстыбаннай кэмитиэт бирииһигэр хапсаҕай күрэҕэ "Өрөгөй" спорт киинигэр 2 күн устата ыытылынна. Бары ыйааһыннарга кыайыылаахтары быһаардылар. 75 киилэҕэ диэри ыйааһыҥҥа муҥутуур кыайыылаҕынан Кэбээйи бөҕөһө Айсен Поскачин буолла. Иван Семенов турнир бастыҥ бөҕөһө аатын ылла.