Сүлдьүкээр булчута – өрөспүүбүлүкэ бастыҥ бөрөһүтэ

Бөрө ахсаанын хонтуруоллааһын. Мииринэй оройуонун Сүлдьүкээригэр ардай аһыылаахтар элбээбиттэрэ бэлиэтэнэр. Олохтоох сонордьут Михаил Никифоров адьырҕа кыыл ахсаанын аҕыйатар соруктаах үлэ үөһүгэр сылдьар.

Михаил Никифоров күн бэҕэһээ туһаҕар түбэспит ардай аһыылааҕы, тимир ытаһалартан босхолуур. Иҥнибит бөрө олус улахан буолан биэрбит. Сүлдьүкээр байанайдаах уола, булчут 2017 сыллаахха өрөспүүбүлүкэҕэ саамай элбэх тириини туттаран турар.  Кини "Бырангат" община салайааччыта.

"Мииринэй оройуонун Сүлдьүкээрэ былыр былыргаттан булдунан-алдынан аатырар дойду. Ол эрэн кэлиҥҥи кэмҥэ бырамыысаланнас да сабыдыала, ардай аһыылаахтар да элбээннэр, атын кыыл -сүөл куотуута баар", -  диэн булчут кэтээн көрүүтүн кэпсиир. Билигин кини адьырҕалары хонтуруолга тутан, бэйэтин бултуур сиригэр балаһыанньа орто.

"Бултуур сирбэр бөрөнү наар бултаһар буоламмын лаппа аҕыйаттым. Онон кыыл таба, тайах уонна мас көтөрө элбээтэ. Мин бөрө ахсаанын хонтуруоллааһын диэн сылы эригиччи бултаһар көҥүллээхпин. Ааспыт сылга 8 адьырҕаны үктэттим. Быйыл 3 буолла уонна иккини куоттардым, онтуларбын көрдүү барыахтаахпын. Холобура, биир тыһы бөрө ортотунан 4-5 оҕонү төрүүр. Ол иһин ахсааннара тһргэнник эбиллэр", - диэн Михаил Никифоров этэр.

Чахчы, биир бөрөттен, элбэх төрүөх тахсар. Онон ахсааны хонутуруолга тутуу - инникки күөҥҥэ. Бу курдук Михаил билигин Сүлдьүкээригэр сүрүн бөрөһүт. Маны таһынан кини күндү түүлээҕинэн эмиэ дьарыктанар.

Михаил Никифоров айылҕалыын алтыһан, төрөөбүт Сүлдьүкээригэр булду-алды хонтуруолга тутан, тарбахха баттанар бөрөһүттэр ахсааннарыгар киирэн, өрөспүүбүлүкэҕэ  бөрө мэнээктээһинин уҕарытар үлэни төрдүттэн ыыта сылдьар.