Оҕолор муус оҥоһуктары кыһан күрэхтэстилэр

Дьокуускайга  оҕолорго уонна учууталларга аналлаах 5-с төгүлүн мууһунан оҥоһуктар күрэхтэрэ буолла. Манна өрөспүүбүлүкэ араас улуустарыттан 15 хамаанда кэлэн кыттынна. Быйылгы куонкурус Учуутал уонна уһуйааччы сылыгар ананна.

Тоҥ мууһу араас үнүстүрүмүөннэринэн кыһан оҕолор муус оҥоһуктары оҥороллор. Быйылгы күрэхтэтэһиигэ кыттааччылар сэбиэскэй саҕанааҕы мультиктар дьоруойдарын ойуулуохтаахтар. Бу күрэххэ араас улуустартан кэлэн күөн көрсө сылдьаллар. Мэҥэ Хаҥалас улууһун оҕо исскуствотын дьиэтиттэн 3 хамаанда кэлэн кытта сылдьар, кинилэри уопуттаах учуутал Петр Петухов арыаллыыр.

Пётр Петухов, Майатааҕы оҕо искусствотын оскуолатын учуутала: "ХаҺыс да сылын кыттабыт. Инники оҕолорум миэстэлэһэр этилэр. Манна миэстэтигэр оҕо ордук ылынар уонна тута билиитин туһанар".  

Күрэх сыала-соруга - оҕо уонна учуутал алтыһыыта. Ол эбэтэр саҕалааччылар учууталларын кэтэбиллэринэн, сүбэлэринэн оҥоһуктары чочуйан таһаарыахтаахтар.

Хас хамаанда ахсын иккилии оҕо уонна биир учуутал баар. Хамаандалар сүрүннээн уолаттартан тураллар. Ол эрэн Дьокуускай куорат оһуордуур-ойуулуур училищетыттан кыргыттар хамаандалара кэлбит. Кинилэр "Ну, погоди" мультикка баар робот куобаҕы оҥороллор.

Күрэхтэһии түмүгүнэн кыттааччылар араас бириистэри ылыахтара. Дьүүллүүр сүбэ уопсайа 5 араас ирдэбилинэн үлэлэри сыаналыыллар. Уопсайа 6 судьуйа үлэлиир. Кыттааччылар таһымнара өрүү буоларын курдук үрдүк, онон ким кыһамньылаахтык үлэлээбитинэн, маастарсытыбаларын таба туһаммыттарын көрөн дьүүллүүр сүбэ кыайыылааҕы быһаарар.

Егор Степанов, дьүүллүүр сүбэ бэрэссэдээтэлэ: "Ол курдук оҥоһук уопсай көрүҥэ, онтон үлэ хаачыстыбата уонна туттар тэриллэринэн сатаан туһаныыны эмиэ көрөбүт. Тиэмэ ис хоһоонун арыйыыны дьүүллүүр сүбэ хайаан да көрөр".

Уопсайа бу күрэхтэһии 5-с төгүлүн ыытыллар. Күрэхтэһии оҕо муус оҥоһугунан күрэҕин көҕүлээччи Михаил Павлович Максимов аатынан ыытыллар. Быйылгы күрэх оҕону патриотическай тыыҥҥа үөрэтии хабааннаах ааста

Быйылгы оҥоһуктар бары даҕаны киһи хараҕын сымнатар, дириҥ ис хоһоонноох гына оҥоһулуннулар. Аны оҕолор оҥорбут үлэлэрэ мантан саас муус куораты киэргэтиэхтэрэ