Медицинэ национальнай киинигэр Бастакы президент Михаил Николаев аатын иҥэрии дьоро тэрээһинэ буолла

26

Бу туһунан дьаһал ааспыт сылга тахсыбыта. Историяҕа бэлиэ түгэн Мэйии уонна нейрогенетикэ киинэ тэрийбит научно-практическай конференциятын кэмигэр барда.

Саха сиригэр доруобуйа харыстабылын сайдыыта Михаил Николаев үтүө аатын кытта быһаччы сибээстээҕин өссө төгүл тоһоҕолоотулар итиэннэ кини аатын иҥэрии махтал бэлиэтэ буоларын эттилэр.   

Салҕыы мэйии уонна нейротехнология федеральнай киинэ саҥа тэриллибит мэйии уонна нейрогенетика киинин кытта сөбүлэҥ түһэристилэр. Онон мантан инньэ саха быраастара бу хайысхаҕа дойду бастыҥ киинин кытта үлэлэһиэхтэрэ. Холбоһуктаах үлэ дэҥҥэ көстөр мэйии ыарыытын үөрэтиигэ уонна эмтээһиҥҥэ туһуланыа.

Мэйии уонна нейротехнология федеральнай киинин генеральнай дириэктэрэ Всеволод Белоусов Саха сирин генетиктара сүҥкэн улахан үлэни ыыталларын бэлиэтээтэ уонна саҥа арыллар киин инникилээҕин ыйда.

Саха сиригэр саҥа тэриллибит киин 4 сүрүн хайысханан үлэлиэ. Онтон биир сүрүнэ - сүрэх-тымыр ыарыытын үөрэтии. Кииҥҥэ  манна суох уустук эрэрээссийэлэр  барыахтара. Кардиососудистай киин үлэҕэ киирбитин ситиһиитэ -  ааспыт сыл түмүгүнэн инсульт курдук ыархан ыарыыттан өлөөһүн ахсаана 10% аччаабытын конференцияҕа иһитиннэрдилэр. 

Күндүл Иванов, сүрэх-тымыр киинин дириэктэрэ: "Мэйии ыарыыта инсульт эрэ буолбатах. Ону үөрэтэргэ наука өттүттэн чинчийиилэр барыахтарын наада. Маны сэргэ бу ыарыылары эмтээһиҥҥэ сүрэх-тымыр киинин саҥа оборудованиелара көмө буолуоҕа".

Мэйии киинэ генынан бэриллэр ыарыылары үөрэтиигэ уонна эмтээһиҥҥэ оҕо төрүөн инниттэн чинчийиилэри ыытыа. Ол курдук уустук ыарыылаах дьон генетиктар көмөлөрүнэн доруобай оҕону төрөтөр кыахтаныахтара. Оччоҕо көлүөнэнэн бэриллэр ыарыы тиһигин быһары быраастар ситиһиэхтэрэ.

Татьяна Павлова, өрөспүүбүлүкэ 1№-дээх балыыһатын перинатальнай киинин дириэктэрэ: "Өрөспүүлүкэ өттүттэн үбүлээһин көрүллэн саҥа оборудование ылылыннаҕына ити үлэ саҕаланыахтаах".

Конференцияҕа инсульт курдук ыарахан ыарыыга улахан болҕомтону ууран кэпсэтии барда. Ол курдук дойду бастыҥ быраастара, учуонайдара саҥа эмтиир ньымалары үллэһиннилэр. Олохтоох медиктары бэйэ холобуругар үөрэттилэр.

Станислав Жирков, өрөспүүбүлүкэ 1№-дээх балыыһатын генеральнай дириэктэрэ: "Сөбүлэҥ түһэрсибит кииммит салалтата уонна исписэлиистэрэ кэлэннэр биһиги быраастарбытын үөрэттилэр. Маны сэргэ саҥа көрүҥ эпэрээссийэлэри оҥорон саҕалаатыбыт".

Ити курдук саҥа тэриллибит Мэйии уонна нейрогенетика киинэ үлэтин киэҥ далааһыннаахтык саҕалаата. Инникитин киин Саха сиригэр доруобуйа харыстабылын үрдүк таһымҥа таһаарыахтаах.