Баскетболга өрөспүүбүлүкэ чемпионата түмүктэннэ

Икки спортивнай сааланан кулун тутар 2 күнүттэн 5 чыыһылатыгар диэри бүтүн түөрт хонук устата баскетболга бэрт тыҥааһыннаах киирсиилэр буоллулар.  1 №-дээх оҕо спортивнай оскуолатын саалатыгар Хаҥалас уонна Нерюнгри улуустарын хамаандалара күрэхтэһэ сылдьаллар. Оонньуу үһүс түһүмэҕэ, ахсаан 38-33, Хаҥаластар инники түһэн эрэллэр. Ол эрээри түмүккэ диэри өссө биир период оонньуу хаалла, оттон балаһыанньа хас мүнүүтэ ахсын уларыйар.

Хайа да хамаанда иннин биэрэр санаата суох, сүрүн сыал - мээчиги быыстала суох төгүрүккэ киллэрии. Бу оонньууга Нерюнгри хамаандата биир очконан кыайыыны ситистэ. Салгыы өссө хас да хамаанданы кытта көрсүһүү.

Степан Григорощук, Нерюнгри хамаандатын кыттыылааҕа: "Хаҥалас хамаандатын кытта олус тыҥааһыннаах оонньуу буолла. Бүтэһигэр хас да оонньооччуну уларытан, чаҕылхай тайм ауттары көрдөрөн кыайыылаах таҕыстыбыт".

Онтон  6 №-дээх оҕо спортивнай оскуолатын саалыгар эмиэ күрэхтэһии өрө күүрүүлээхтик бара турар. Дьокуускай куорат хамаандатын кытта Уус Алданнар киирсэллэр. Куорат хамаандата самай күүстээх оонньооччулардааҕынан киэҥник биллэр. Өрүү инники кирбиигэ сылдьар хамаанда. Ахсаан 51-8 Дьокуускай хамаандатын туһатыгар. Уус Алданнар «улахан бэлэммит суох, онон хотторон иһэбит» диэн санааларын үллэстэллэр.

Баскетболга өрөспүүбүлүкэ чемпионатыгар быйыл уопсайа 18 хамаанда күрэхтэһэр. Дьокуускай, Мииринэй, Алдан, Нерюнгри куораттарын тэҥэ Таатта, Амма, Мэҥэ Хаҥалас, Уус Алдан, Ханалас, Нам, Бүлүү бөлөх улуустарын бастыҥ баскетболистара муһуннулар. Бүлүү улууһун хамаандата куһаҕана суох көрдөрүүлээх оонньуутун саҕалаабыт. Ол курдук ыаллыы сытар Үөһээ Бүлүү хамаандатын кыайан сүргэлэрэ көтөҕүллэ сылдьар.   

Василий Титяров, Бүлүү хамаандатын кытыылааҕа: "Иккис оонньуубутун оонньоотубут. Эмиэ ыарахан этэ. Дьокуускай уонна Мэҥэ Хаҥалас хамаандалара олус күүстээхтэр"

Күрэхтэһиигэ Хотугулуу-Илиҥҥи федеральнай университет хамаандата эмиэ турунан оонньуур. Виталий Новиков университет сүүмэрдэммит хамаандатын чилиэнэ. Бастетболунан 11 кылаастан ыла үлүһүйэр, билигин кини историческай факультет 3 кууруһун устудьуона.

Виталий Новиков, ХИФУ хамаандатын кыттыылааҕа: "Хамаандам быйыл күүстээх. Ол эрэн кыһыылаахтык кыаттаран хааллыбыт".

Баскетбол чемпионата эр дьон уонна дьахталлар хамаандаларын ортотугар бэрт тэрээһиннэхтик ааста. Бу чемпионаты тэҥэ бастакетболга юниордарга Уһук Илиннээҕи тус бастыыр иһин күрэхтэһии эмиэ тэриллэн ыытылла турар.