Учууталлар турнирдара

Дьокуускайга учууталлар хамаандаларын методическай турнира ыытылла турар. Тэрээһин үтүө үгэс быһыытынан быйыл номнуо 8 сылын буолар. Манна Саха сирин күүстээх уонна эдэр кэскиллээх педагогтара түмсэн үөрэҕирии хаачыстыбатын үрдэтиигэ бэйэлэрин сатабылларын туһаналлар.

Өйдөөх үөрэхтээһин - өйдөөх регион. Бу маннык девизтэээх учууталлар хамаандаларын өрөспүүбүлүкэтээҕи методическай турнира 3 күн устата ыытыллар.  Саха сирин үрдүнэн уопсайа 18 хамаанда кэтэхтэн кыттыбытыттан, сэттэтэ кытаанах сүүмэрдээһини ааһан финалга таҕыста. Тэрээһин үгэс быһыытынан сыл ахсын барар, быйыл номнуо ахсыс сылын учууталлар хамаандалара уун утары көрсөн күрэхтэһэллэр. Хас биирдии хамаанда 4 киһиттэн турар. Сүрүннээн кинилэр холбоһуктар. Ол курдук араас улуус, куорат, нэһилиэк педагогтара түмсэн кытталлар.

Методическай турнир үөрэхтээһин сайдыытын саҥа инновационнай суолун тобулууга, улуус үөрэҕириитин ситимин үрдэтиигэ итиэннэ саҥа педагогическай компетенциялары тарҕатыыга туһуланар. Үс күн устата хамаандалар хас да түһүмэҕинэн күрэхтэһэллэр. Ол курдук үөрэҕирии бырайыага, кылаас чаас, маастар кылаастар хайысхаларыгар бэйэлэрин көрүүлэрин, сатабылларын үллэстиэхтэрэ. Бастакы күн - бырайыак таҥыыга, көмүскээһиҥҥэ ананна. Хамаандаларга Дьокуускай оскуолаларын тарҕатан, кинилэр кыһалҕаларын быһаарыыга үлэлэһэллэр. Сунтаар улууһун холбоһук хамаандата “Үрдэл» диэн ааттанан үрдүк көрдөрүүлэри ситиһэргэ дьулуһар. 

Пётр Николаев, Сунтаар улууһунааҕы оҕо айымньытын киинин педагога: "Биһиэхэ "Дьокуускай 26№-дээх оскуолатыгар оҕо үөрэххэ талаһыытын күүһүрдүү” диэн сорудах кэллэ. Манна ырытан көрүү түмүгүнэн учууталлар үгүстэрэ өр сылларга үлэлииллэр эбит. Онон Уһуйааччы сылыгар сөп түбэһиннэрэн уопуттаах учууталлары оҕолору кытта тэҥҥэ үлэлэһэр бырайыактарын оҥорон таһаардыбыт".

Турнир үөрэҕирии эйгэтин үлэһиттэрин идэлэрин таһымын үрдэтэр институт  уонна классическай гимназия дьиэтигэр ыытыллар. Иккис күн кыттааччы учууталлар үөрэнээччилэри кытта көрсөн кылаас чаастарын ыыттылар. Онтон үһүс күн бэйэлэрин маастар кылаастарын көрдөрөллөр. Бү түһүмэх, тэрийээччилэр бэлиэтииллэринэн, педагог үрдүк маастарыстыбатын тургутар көрүҥ буолар.

Елизавета Яковлева, СӨ идэ таһымын үрдэтэр институт педагогтар сатабылларын сыаналыыр кафедратын сэбиэдиссэйэ: "Күрэххэ мустубут учууталлар бэйэлэрин улуустарыгар, өрөспүүбүлүкэҕэ туох саҥаны, сонун ньыманы биэриэхпитин сөбүй диэн муһуннулар".

Тэрээһиҥҥэ өрөспүүбүлүкэ күүстээх эдэр кэскиллээх педагогтара муһуннулар. Кинилэр күрэхтэһиигэ идэлэрин таһымын үрдэтэр кыах ыллылар.