Тутуу быыстапката үлэлээтэ

Тутуу эйгэтигэр дойдуга бүтэһик уларыйыылар барыта биир саалаҕа түмүллүллүбүттэр. Ол курдук араас регионнартан бэрэстэбиитэллэр кэлэн кыттыыны ылаллар. Быйылгы тэрээһин уратыта - тастан киириини олохтоох оҥоһуунан солбуйуу итиэннэ саҥа суоллары тобулуу. Саха сириттэн сүрүннээн чааһынай дьиэни тутар тэрилтэлэр кыттыыны ыллаллар. Тыйыс усулуобуйаҕа барсар ичигэс уонна  удамыр сыаналаах тутуу матырыйаалын оҥорооччулар болҕомто үөһүгэр буоллулар. Киэҥник тарҕаммыт СИП панель диэни өрөспүүбүлүкэ тас өттүгэр хамаҕатык атыылыыр тэрилтэ саҥа көрүҥү таһаараары сылдьары сэҥээрэ иһиттилэр.

Атын регионнартан сырдыыр фигуралары, декоративнай мастары көрдөрүүгэ аҕалбыттар. Маны сэргэ ороскуоту учуоттуур, кэмниир прибордары оҥорон таһаарар тэрилтэлэр үгүс киһи сэҥээриитин ыллылар. Саха сирин дьоҕус инновационнай хампаанньата гараас тутарга сөптөөх аныгы матырыйаалы итиэннэ итиини тутар уу ситимин турбатын быыстапкаҕа туруорбута үгүс болҕомтону татта.

Иван Львов, дьоҕус инновационнай тэрилтэ коммерческай дириэктэрэ: "Биһиги оҥорон таһаарар турбаларбыт итиини олус үчүгэйдик туталлар. Сүтэрии бырыһыана 3 эрэ тэҥнэһэр. Билигин Арктика оройуоннарыгар тутуу матырыйаалын уонна турбалары тириэрдиигэ сүрүн күүспүтүн уурабыт".

Маны сэргэ дьиэ бүрүөһүнэ, уотунан барар уонна дизель генератордар, уу иһиттэрэ, "өйдөөх дьиэ" аныгы технологиялара, сыбаайа олордуллар сирин үүттүүр установкалар көрдөрүүгэ турдулар.  Уопсайынан сэҥээрэ көрбүтү тута атыылаһар эбэтэр дуогабардаһар кыаҕы быыстапка тэрийдэ. Онтон дьиэ туттуон баҕалаах дьон ханнык матырыйаалларынан билигин тутар ордугун, сыанытыгар барыстааҕын быыстапкаҕа холкутук билсэр уонна суоттанар кыахтаахтар. Ол курдук бэлэм бырайыактары кэлэн көрүөхтэрин эбэтэр бэйэлэрин баҕаларын суоттатыахтарын сөп.

Быыстапка чэрчитинэн тутууга сыһыаннаах сэминээрдэр, төгүрүк остуоллар, маастар кылаастар ыытыллыахтара. Маны сэргэ тутуу быыстапкатын иитинэн бу эйгэҕэ сыһыаннаах үлэ дьаарбаҥката тэрилиннэ.