Учуутал дьаарбаҥката

Дьокуускайга Хотугулуу-Илиҥҥи федеральнай университет уонна педагогическай колледжтар кыттыылаах үрдүк, орто учуутал идэлээх итиэннэ быйыл үөрэхтэрин бүтэрээри сылдьар выпусниктарга анаммыт үлэ дьаарбаҥката буолла. Бөдөҥ тэрээһиҥҥэ 28 улуустан 120-тэн тахса үлэ биэрээччи уопсайа 1 тыһыынчаттан тахса вакансияны туруорда.

Педагог идэлээхтэргэ үлэ миэстэтин таһаарар дьаарбаҥка сыллата Үөрэҕирии министиэристибэтин көҕүлээһининэн тэриллэр. Быйылгы үөрэх дьылын бу бастакы ыытыллар тэрээһинигэр биир тыһыынчаттан тахса вакансияны туруордулар. Киин куораты таһынан 28 улуустан үөрэҕирии тэрилтэтин бэрэстэбиитэллэрэ кытыннылар. 

Лилия Дедюкина, Чурапчы улууһун үөрэҕириигэ салалтатын каадырдарга салаатын начальнига: "Быйылгы үөрэх дьылыгар чурапчы улууһугар 20 тахса вакансия аһаҕас. Үксүн нуучча тыла, математика, омук тылын учууталларын көрдүүбүт".

Дьокуускайдааҕы педагогическай колледж дьиэтигэр сүүһүнэн киһи муһунна. Хас биирдии улуустан бүтүн делегациянан кэлэн наадыйар исписэлиистэрин кытта дуогабар түһэрсэллэр. Манна оскуолалар, оҕо саадтара, ону тэҥэ үөрэҕирии кииннэрэ үлэ миэстэтин таһаардылар. Онон быйыл үөрэхтэрин бүтэрээччилэр ырааппакка тута үлэ булунар кыахтаннылар. Нарыйа Васильева Дьокускайдааҕы педколлеһы быйыл бүтэрэр.

Нарыйа Васильева, Дьокуускайдааҕы педагогическай колледж устудьуона: "Алын кылаас учууталын идэтин бүтэрэбин. Бэйэм Ньурбаттан сылдьабын, онон дойдубар көрдүүбүн".

Хас биирдии улуус уонунан исписэлиискэ наадыйарын дьаарбаҥкаттан сиһилии билсиэххэ сөп. Манна ордук хотуттан элбэх бэрэстэбиитэл кэлбит. Хоту, арктическай улуустарга сыллата сүрүн кыһалҕанан учуутал тиийбэтэ буолар. Холобура, Дьааҥы улууһугар бүтүн 46 учуутал, ииитэччи наада. 

Андрей Устинов, Дьааҥы улууһун үөрэҕириигэ салалтатын бэрэстэбиитэлэ: "Биһиэхэ ордук математика, физика, нуучча тылын, химия, омук тылын, алын кылаас учууталлара наадалар. Маны сэргэ оҕо саадыгар уһуйааччылар эмиэ тиийбэттэр. Уопсайа барыта улуус үрдүнэн 46 учуутал миэстэтэ аһаҕас".

Оттон дьаарбаҥкаҕа кэлбит ыччат үксэ киин сиртэн тэйбэккэ үлэ булар санаалаах. Бэйэтэ Эбээн Бытантай улууһуттан төрүттээх Клара Афанасьева чугас эргин улуустарга учууталлыы барар былааннаах.

Клара Афанасьева, Дьокуускайдааҕы педагогическай колледж устудьуона: "Хас да улуус бэрэстэбиитэллэрин кытта кэпсэттим. Онтон резюмебын ыытыам. Чугас эргин көрдүүбүн".

Учуутал идэтэ уруккуттан билиҥҥэ диэри биир саамай наадалаах, ытыктанар идэлэртэн биирдэстэрэ. Оҕону, кэлэр көлүөнэни үөрэтиигэ-иитиигэ олоҕун аныан баҕалаахтар эрээттэрэ сыллата хаҥыыр. Маныаха эдэр үлэһиттэри өйүүр сыаллаах кэккэ бырыайыактар үлэлииллэр. Бүгүҥҥү күҥҥэ өрөспүүбүлүкэҕэ учуутал идэлээхтэри чуолаан тыа сиригэр уонна  хоту үлэлииллэригэр көҕүлүүргэ анаммыт 3 бырагыраамма баар.

Мария Москвитина, СӨ үөрэҕириигэ уонна наукаҕа министиэристибэтин кылаабынай исписэлииһэ: "Үөрэхтэрин саҥа бүтэрбит оҕолор хоту эбэтэр Арктика улуустарыгар 5 сыл учууталлаатахтарына 1 хостоох квартира сыанатын аҥарын уйунуу, иккиһинэн Арктика улуустарыгар барбыт учууталларга биир кэмнээх көмө харчы көрүллэр уонна “Земкий учитель” диэн федеральнай бырагыраамма баар".

Маннык тэрээһин үлэ миэстэтин таһаарааччыларга даҕаны, устудьуоннарга даҕаны кедьүүстээх. Педагогическай дьаарбаҥка сылга иккитэ үрдүк тэрээһиннээхтик ыытыллар. Түмүккэ,  улуустар эдэр исписэлиистэри, үөрэхтэрин бүтэрээччилэри кытта дуогабар баттаһан аны күһүн үлэҕэ күүтэллэр