Ил Түмэҥҥэ бастакытын икки тылынан ыҥырыылаах мунньах ааста

Ил Түмэн пленарнай мунньаҕа буолан ааста. Норуот депутаттара барыта 50 сокуон барылын көрдүлэр. Ол иһигэр Георгий Степановы Бырабыыталыстыба Бэрэссэдээтэлин солбуйааччытын дуоһунаһыгар өйүүллэрин биллэрдилэр. 42 ыҥырыылаах мунньах биир сүрүн уратыта - сокуон барыллара икки судаарыстыбаннай тылынан - сахалыы уонна нууччалыы киириилэрэ.

Пленарнай мунньах  Георгий Степанов Бырабыыталыстыба Бэрэссэдээтэлин дуоһунаһыгар ананыытыгар сөбүлэҥи биэрииттэн саҕаланна. Георгий Степанов саҥа хайысханы сүрүннүөҕэ. Ол курдук  кини бырабыыталыстыбаҕа  дьарыктаах буолуу хайысхатын, социальнай өттүнэн харысхаллаах буолууну, дьиэ кэргэн политикатын уонна эргиэн боппуостарынна дьапыктаныаҕа.

Георгий Степанов, Бырабыыталыстыба Бэрэссэдээтэлин солбуйааччытын эбээһинэһин толорооччу: "Биһиги сүрүн сорукпут – Саха сирин олохтоохторун материальнай хааччыллыыларын бөҕөргөтүү уонна үрдэтии. Маны сэргэ кыра дохуоттаах дьон ахсаанын аччатыы буолар".

42 ыҥырыылаах мунньах - историяҕа киирэр бэлиэ мунньах буолла. Ол курдук аан маҥнайгытын сокуон барыллара икки тылынан - сахалыы уонна нууччалыы көрүүгэ киирдилэр. Бу туһунан сокуон тохсунньу 1 күнүттэн күүһүгэр киирбитэ.

Алексей Еремеев, Ил Түмэн бэрэссэдээтэлэ: "42 уочараттаах мунньахз бастакытын сокуоннары икки тылынан көрдө. Бэбиэскэҕэ киирбит 50 барыл уонна ураах бары икки тылынан киирдилэр".

Норуот депутаттара айылҕа харыстабылыгар сыһыаннаах хас да сокуону көрдүлэр итиэннэ ылыннылар. Ол курдук тимир суолу тутууга аукциона суох карьеры туһаныы туһунан сокуонунан бигэргэннэ. Маны таһынан сир баайын хостооһунтан хаалбыт тобоҕу суол тутуутугар туһаныыныыга депутаттар сөбүлэҥнэрин биллэридлэр. Салҕыы норуот талыылаахтара айылҕаны харыстааһын сүрүн сокуонун экология кодексын  бигэргэттилэр.

Сахамин Афанасьев, Ил Түмэн депутата: "Бу кодексы ылыныыга хас да сыллаах улахан үлэ барда. Исписэлиистэр, учуонайдар уонна норуот депутаттара бу үлэҕэ кыттыстылар. Бу холбоһуктаах үлэ Александр Жирков көҕүлээһининэн барда. Манна барыта сэттэ сокуон киирдэ – айылҕа харыстабылын, ураты харыстанар сирдэр, экспертиза, радиация туһунан".  

Тыа хаһаайыстыбатыгар сыһыаннаах икки боппуруос бэбиэскэҕэ киирбитэ. Депутаттар олохтоох оҥорон таһаарааччыларга көрүллэр судаарыстыбаттан көмөнү судургутутуу сокуонун бырайыагын бастакы ааҕыыга ылыннылар. Ситэрии - хоторуу кэннэ кэлэр мунньахха хаттаан көрүөхтэрэ. Онтон үүт лиитэрэтигэр уонна төбө иһин төлөбүр Ил Түмэнинэн бигэргэннэ. Онон хаһаайыстыбалаахтар кулун тутартан үрдээбит кээмэйинэн аахсар буоллулар.

Андрей Находкин, Ил Түмэн депутата: "Нэһилиэнньэ кэтэспит боппуроһа быһаарылынна. Төбө иһин төлөбүр уонна үүт харчыта үрдээһинин сокуона бүтэһиктээх ааҕыыга ылылынна".

Маны сэргэ медицинскэй вытрезвителлэри тэрийэр туһунан сокуону бастакы ааҕыыга ылыннылар. Маны сэргэ прокурор сокуону оҥорор быраабын туһанан бастакы сокуон барылын Ил Түмэҥҥэ киллэрдэ. Сокуоннай саастарын ситэ илик оҕолорго уопсастыбаннай наставниктары сыһыарыыны сокуонун бигэргэттилэр