Бэрдьигэстээх аҕам саастаахтара ытыыга күрэхтэстилэр

Бэрдьигэстээхтэр  кэлиҥҥи сылларга араас таһымнаах граннарга көхтөөхтүк кыттан, нэһилиэги  бары эйгэҕэ сайыннарар суолу тобуллаллар. Ол курдук ситиһиилээх бырайыактары суруйан спортивнай, култуурнай, социальнай хайысхаларга хамсааһыннар күүүһүрдүлэр. Биир маннык бырайыагынан "Уһун олоххо туһуламмыт хамсааһын"  диэн ааттаах аҕам саастаахтары чэбдигирдэр бырайыак  буолар. Бырайыак иитинэн бу күннэргэ бэтэрээннэр ортолоругар ытыы  күрэҕэ буолла.

"Уһун олоххо хамсааһын" диэн Ил Дархан гранын  кыайыылаах бырайыага 302 тыһ. солкуобай  үпкэ тиксибитэ. Онон аҕам саастаахтар ортолоругар хас да түһүмэҕинэн араас күрэхтэһиилэр бараннар, бырайыак олоххо киирдэ. Ол курдук бу күннэргэ "Бэргэн" ытыы  комплексыгар, Бэрдьигэстээх түөлбэлэрин 60-тан үөһэ саастаах дьонун ортотугар "Куруппааскы" диэн салгын саатынан ытыыга күрэхтэһии буолла. Манна уопсайа 9 түөлбэттэн 47 киһи кыттыыны ылла.

Дмитрий Агеев,  күрэх сүрүн судьуйата, нэһилиэк бэтэрээннэрин сүбэтин бэрэссэдээтэлэ: "Барыта 12 түөлбэттэн 9 түөлбэ кыттыыны ылла. Хамаанда 3 эр киһиттэн уонна 3 дьахтартан турда. Сүрүн сыал – аҕам саастаах дьону спортка сыһыарыы, чөл олоҕу өрө тутуу".

Күрэхтэһии балаһыанньатынан 10 миэтирэ ыраахтан 10 мүнүүтэ иһигэр биирдии киһи 5-тии  биатлон сыалын ытыалаатылар. Эрдэ сыалларын таппыттар аттынааҕы киһилэригэр таба ытыыга көмөлөстүлэр.

Ытыыга  "Чэбдик" ТОС эр дьоно 1 мүн. 20 сөк иһигэр 15 сыалы толору таба охсоннор рекорду олохтоотулар.

Михаил Салгынов, "Чэбдик" түөлбэ хамаандатын чилиэнэ: "Оҕо сааспыттан сааҕа сыстыгаспын. Билигин кыралаан улахан бултка сылдьабын.Онтум бу күрэхтэһиигэ олус туһалаата".

Уон оҕолоох ыалга төрөөбүт Анна Кириллина өссө оҕо эрдэҕиттэн саа тутан бултаабыт. Маныаха кинини биэс улахан убайдара уһуйбуттар. Билигин да Анна кыралаан кэргэнин кытары булка сылдьар, онон бу уопута курэхтэһиигэ ситиһиилээхтик кыттарга тирэх буолла.

Анна Кириллина, "Үрдэл" түөлбэ хамаандатын чилиэнэ: "Убайдарбын батыһан кыра сааспыттан сааланабын. Онтон билигин үлүһүйбэтэрбин даҕаны, күһүн саас куска сылдьабын".

Аҕам саастаахтар уһун кыһынтан салҕыбыт буоланнар сэргэх тэрээһинтэн, бэйэлэрин кыахтарын тургутан астыннылар.

Күрэс түмүгүнэн дьахталларга "Сардаана" түөлбэ 3 миэстэ, "Чэбдикн" түөлбэ 2 миэстэ, "Үрдэл" түөлбэ 1 миэстэ буоллулар. Оттон эр дьоҥҥо, "Эйэлэр" 3 миэстэ, "Үрдэллэр" 2 миэстэ, "Чэдиктэр" 1 миэмтэҕэ тиксэннэр сыаналаах бириистэри туттулар.