Сүлдьүкээрдэр балыыһата эмчитэ суох 4 сылын үлэлиир
Мииринэй оройуонун Сүлдьүкээрин фельдшерскэй пуунугар үлэһит тиийбэт кыһалҕата сытыытык турар. Туох баар усулуобуйа, үлэлиир миэстэ аныгы ирдэбилгэ толору эппиэттиир. Ол эрэн исписэлиистэр үлэлии тиийбэттэрэ олохтоохторго үгүс күчүмэҕэйи үөскэтэр.
30 сыл устата, олоҕун аҥарын дьону эмтээһиҥҥэ, нэһилиэгин олохтоохторун доруобуйаларын туһугар туруулаһан туран үлэлиир, идэтинэн медицинскэй сиэстэрэ Анна Никифорова үлэ үөһүгэр сылдьар. Кини номнуо 3 сылын каадыр тиийбэт кыһалаҕатыттан үлэни барытын бэйэтэ оҥорорго күһэллэр
Анна Никифорова, Сүлдьүкээрдээҕи фельдшерскай пуун үлэһитэ: "Идэбинэн сиэстэрэбин ол эрэн туох баар 8лэни барытын о4оробун. Укол туруорабын, ыарыһахтары аттынааҥы нэһилиэккэ илдьэбин, вакцина туруорабын. Уопсайынан миигиттэн тутулуктааҕы барытын толоробун. Балыыһабыт сабыс-саҥа киһи эрэ үлэлиэн баҕарар, ол эрэн исписэлисс суох этэ суох даҕаны".
Кырдьык усулуобуйа барыта тэриллибит. Саҥа фельдшерскэй пуун Сүлдьүкээргэ 2005 сыллаахха тутуллан үлэҕэ киирбит. Манна процедурнай хос, лаборатория, акушерка, тиис бырааһын хосторо бааллар. Киэҥ-куоҥ аныгы ирдэбилгэ толору эппиэттиир эбийиэккэ үлэһит суоҕа эрэ күчүмэҕэйдэри үөскэтэр. Билигин ыалдьыбыт дьон Светлай бөһүөлэгэр баран эмтэнэргэ күһэллэллэр. Оттон күһүн саас суол сабылынна эрэ ыалдьыбыт дьоҥҥо эрэй бөҕө үөскүүр.
Вера Афанасьева, "Садым национальнай нэһилиэк" МТ баһылыга: "Кэнники 3-4 сылга фельдшер суоҕа биһиги нэһилиэк биир сытыы кыһалҕата. Нэһилиэнньэ саҥа исписэлиис кэлиитин олус туроурсар. Ол иһин федеральнай бырагыраамманы таһынан бэйэбит эбии үп көрдүбүт".
Чахчы тустаах нэһилиэккэ, «Земскэй фельдшер» бырагыраамманы таһынан улуус бэйэтэ көрөн, эбии кэлбит исписэлиискэ 1 мөлүйүөн солкуобай үп тыырыаҕа. Олорор дьиэнэн хааччыйыаҕа. Онон дуогабардаһан кэлбит үлэһит 2 мөлүйүөн солкуобайы тутатына ылар. Ол эрэн манна фельдшер үлэтэ, атын сирдэрдээҕэр, ыарахан, уратылаах.
Манна даҕатан эттэххэ, Мииринэй оройуонун өссө биир нэһилиэгэр Таас Үрэххэ эмиэ үлэһит тиийбэт кыһалҕата турар. Улахан нэһилиэнньэлээх пууҥҥа эмчит суоҕа үгүс кыһалҕаны үөскэтэр. Улуус кылаабынай бырааһа иһитиннэрэринэн, Алмаастаах кыраайга доруобуйа харыстабылын эйгэтигэр үгүс үлэ миэстэтэ баар.
