"Кэнчээри" сулустаах суолунан

"Кэнчээри" Россия образцовай оҕо народнай ансаамбыл 50 сыллаах үбүлүөйүн бэлиэтиир дьоро тэрээһиннэр киин куоракка ыытыллаллар. "Россия - мин историям" түмэлгэ хаартыскаларынан быыстапка, кинигэ - альбом, "От фольклора до классики" киинэ сүрэхтээһинэ буолла. Оттон  "Уйгу сирэ - Уус Алдан" диэн үбүлүөйдээх  улахан дьоро кэнсиэри кулун тутар 4 күнүгэр опера уонна балет тыйаатырыгар  тэрийиэхтэрэ.

Оҕо дэгиттэр сайдыытын инники күөҥҥэ тутан, араас таһымнаах күрэхтэр кыайыылахтара буолбутун,  үрдүк  сыанабылы ылбытын, элбэх көлүөнэ талааннаах ыччаты таһаарбытын хаартыскаларынан быыстапка кэпсиир.

Саргылаана Адамова, СӨ  култууратын үтүөлээх үлэһитэ,геокультурнай сайдыы институтун үлэһитэ: "Ансаамбыл 1972 сылтан саҕалаан историятын, бастакы көстүүмнэри астына дуоһуйа көрдүм. Хор оскуолатын сайдыыта бу быыстапкаҕа эмиэ арылыччы көстөр. Киин телевидениеҕа кыттыбыт түгэннэриттэн хаартыскалар дьон сэҥээриитин ыллылар".

Үбүлүөйү көрсө сыл устата "Кэнчээри" ансаамбыл ситиһиилэрин, ураты хайысхалаах үлэтин көрдөрөр-биллэрэр тэрээһиннэр тиһигин быспакка ыытылыннылар.  Билиҥҥи кэм ирдэбилинэн баай матырыйааллары, хаартыскалары,  видео устуулары   куйаар ситимигэр киллэрэр улахан үлэ барда. Маныаха "Кэнчээри" бары выпускниктара, "Айар кут" холбоһук күүс көмө буоллулар.

Екатерина Парникова, РФ уопсай үөрэхтээһинин бочуоттаах үлэһитэ, "Кэнчээри" ансамбль  фольклорнай бөлөҕүн  салайааччыта: "Сыл устата бу быыстапкаҕа бэлэмнэннибит. "Кэчээрини" бүтэрбит сүүһүнэн оҕону түмтүбүт. Онон 50 сыл устата сылдьыбыт оҕолор бары үйэтитилиннилэр. Сыл устат элбэх үлэ барда".

Быыстапканы  таһынан альбом-кинигэлэри сүрэхтээтилэр. 10-нуу сылынан түмүллэн уопсайа 5 кинигэ таҕыста. Ансаамбылы төрүттэспит салайааччылар, выпускниктар  маннык үйэтитэр тэрээһин улахан суолталааҕын бэлиэтииллэр.

Елена Прокопьева, "Кэнчээри" оҕо образцовай ансамбылын үҥкүүтүн бөлөҕүн бастакы салайаччыта, СӨ култууратын туйгуна: "50 сыл диэн этэххэ эрэ дөбөҥ. Ол эрэн үлэлэээри гыннахха олус элбэх. Тэрийээччибитин, уһуйааччыбытын Василий Степановыһы бу сыллар тухары бэйэтэ барытын салайан, тэрийэн кэлбит киһибитин үбүлүөйдээх сылынан эҕэрдэлиибит".

Ансаамбыл  хас да көлүөнэ выпускниктара  билигин олох араас эйгэтигэр ситиһиилээхтэр. Култуура үтүөлээхтэрэ, туйгуннара, күн бүгүн саха норуотун култууратын тарҕатыыга үлэлииллэр. Оттон  кинилэр "Кэнчээригэ" уһуйуллуулара  киһи быһыытынан сайдалларыгар улахан оруоллааҕын этэллэр.

Виктория Бястинова, "Кэнчээри" ансаамбыл выпускнига, суруналыыс: "Кэнчээри" ансаамбыл уонна Василий Степанович мин олохпор улахан төһүү буолбуттара. Биһи бары кини иитиитин, үөрэҕин иҥэринэн улааппыппыт. Ол биллэн турар, билигин да биһиэхэ көмөлөһө сылдьар. Кини оҕо дэгиттэр буолуохтаах диэн концепциятын тутуһан араас өттүнэн сайдарга дьулуһарбыт".

Алина Герасимова, "Кэнчээри" ансаамбыл выпускнига, "Айыы кыһата" оскуола дириэктэрин иитэр үлэҕэ сүбэһитэ: "Өй-санаа, эт-хаан өттүнэн сайдыыны уонна элбэх доҕоттору миэхэ "Кэнчээри" биэрбитэ. Ону таһынан сири-дойдуну көрбүппүт. Саамай сүрүнэ, дьону кытары сатаан алтыһарга мин үөрэммитим".

50 сыллаах үлэ ис хоһоонун,  историятын сиһилии көрдөрөр "От фольклора до классики" документальнай киинэ  үбүлүөйдээх сылга таҕыста. Киинэ сүрэхтэниитигэр выпускниктар оччотооҕу кэми  санаан аастылар. Оттон киинэ өрөспүүбүлүкэ бастыҥ кэллэктиибин  таһымын, салайааччы Василий Парников оҕону сайыннарар ураты  ньыматын, выпускниктар ахтыыларын түмэ тутан  көрдөрөр.