Дьокуускай – Килбиэннээх үлэ куората
Аҕа дойду Улуу сэриитин кэмигэр олохтоохтор сүҥкэн кылааттарын, дьоруойдуу быһыыларын иһин Дьокуускай куорат "Килбиэннээх үлэ куората" диэн үрдүк бэлиэни тутта.
Аҕа дойду сэриитин кэмигэр Саха сириттэн элбэх буойун сэриигэ баран дойдутун туһугар туруласпыта. Маны таһынан олохтоохтор 40-ча туонна кыһыл көмүс туттарбыттара, фроҥҥа ас-үөл, таҥас-сап тохтообокко тиһигин быспакка ыытыллара. Саха дьоно дойдутугар бэринилээҕин, биир сомоҕо буоларын көрдөрбүтэ.
Пантелеймон Петров, историческай наука кандидата: "Дьокуускай куораттан 12 Сэбиэскэй Сойуус Дьоруойа баар буолбута уонна 10 тыһыынча киһи Уордьанынан наҕараадаламмыта".
Чурапчыттан төрүттээх Мария Григорьева 83 сааһыгар барда. Кини ол кэми этинэн-хаанынан билэн улааппыт сэрии оҕото буолар. "Биһиги киин куораппытыгар маннык үрдүк ааты иҥэрбиттэрэ, биһиэхэ улахан суолталаах уонна долгутулаах" диэн этэр.
Саха сиригэр аны икки "Килбиэннээх үлэ куората" баар буолла. Дьокуускай уонна Алдан. Олохтоохтор, бэтэрээннэр Дьокуускай куорат бу ааты ылбыта олус сөптөөх диэн этэллэр.
Матвей Лыткин, Дьокуускай куорат общественнай палаататын бэрэссэдээтэлэ: "Кыайыы кэлэригэр биһиги куораммыт олохтоохторо бары кыахтарын ууран туран көмө буолбуттара, олохторун толук ууралларын да кэрэйбэтэхтэрэ бу үрдүк аатынан сыаналаммыта олус сөптөөх".
Ирина Соловьева, Дьокуускай куорат бэтэрээннэрин сэбиэтин чилиэнэ: "Дьокуускайбыт үүнэ-сайда турарыгар бу үрдүк аат төһүү буолуо. Онон салалтаҕа улахан махтал".
Маны таһынан, тэрээһиҥҥэ "Килбиэннээх үлэ" өйдөбүнньүк комплексын бырайыагын киин куорат баһылыга Евгений Григорьев билиһиннэрдэ. Саҥа тутуу Кыайыы пааркатыгар тутуллуоҕа. Манна сэрии сылларын кэмэ, суруктара, хаартыскалара киириэхтэрэ. Бу тутуу үйэ саас хаалан, кэлэр кэнчээри ыччат өйдүү саныы сылдьарыгар туһуланар.
