Социальнай өйөбүлгэ миллиардтан тахса үп-харчы ыытылынна

Ил Дархан Айсен Николаев анал байыаннай эпэрээссийэ кыттыылаахтарыгар судаарыстыбаннай наҕараадалары туттарда. Ол курдук, Аҕа дойду көмүскээччилэрин күнүгэр регион баһылыга 11 Саха сириттэн сылдьар байыастарга, бу иһигэр 3 киһиэхэ өлбүттэрин кэннэ Россия судаарыстыбаннай наҕараадаларын туттарда. Ил Дархан бүтэһик сылга Аҕа дойдуну көмүскээччи оруола хас да бүк улаатта. Биһиги дойдубутугар бу ураты суолталаах бырааһынньык диэн бэлиэтээн эттэ.

"Мин бастаан контрагынан барар санаалааҕым, ону доруобуйан туругунан сөп түбэспэккин диэбиттэрэ. Онтон баҕа өттүнэн барар дьон хамаандалара баарын туһунан истэн, онно кыттыһан барбытым. Мин санаабар, хас биирдии эр киһи, төрөөбүт дойдутун хайаан да көмүскүөхтээх. Бүгүҥҥү наҕараадам “За заслугу перед отечеством” диэн. Манна биһиэхэ көмө буолбут,  тыылга баар, көмө харчы биэрбит дьон бары, бу наҕараадаҕа кыттыылааххыт диэн этиэхпин баҕарабын. Эһигинэ суох, холобура, туох да сатаныа суоҕа этэ. Оннооҕор оҕо суругун тутан киһи үөрэр, астынар", - диэн Анал байыаннай эпэрээссийэ кыттыылааҕа Лев Слепцов санаатын үллэһиннэ.

Ил Дархан өрөспүүбүлүкэ байыаннай дьайыы кыттыылаахтарын уонна кинилэр дьиэ кэргэттэрин өйүүр көмө судаарыстыбаннай пуондатын тэрийии туһунан иһитиннэрдэ. Күн бүгүн, социальнай өйөбүлгэ миллиардтан тахса үп-харчы ыытылынна. Маныаха билигин биир кэлим координационнай киин көдьүүстээхтик үлэлиир, байыаннай дьайыыга сылдьар буойуттарга күүс-көмө буолар.