Мамонт түмэлигэр түҥ былыргы эһэ мэйиитин хостоотулар

Түҥ былыргы эһэ геологическэй сааһа 3460 сылга тэҥнэһэр. Кыыл кырамтатын 3 сыл аннараа өттүгэр Новосибирскайдааҕы архипелаг Улахан Ляховскай арыытыгар олохтоохтор булбуттара. Сэдэх булумньу аан дойдуга бастакы уонна соҕотох бүтүн эттээх-сииннээх көстүбүт буолан, аан дойду учуонайдарын болҕомтотун тардар.

"Этин чааһа барыта баар. Көрүҥэ үчүгэй, ол аата мууска өр сыппыт. Номнуо үөрэтэн ыыратыннардыбыт, хас да научнай ыстатыйа таҕыста. Бу бүгүҥҥү чинчийиилэринэн эмиэ ыстатыйалары таһаарыахпыт", - диир ХИФУ научнай-чинчийэр институтун палеонтологияҕа лабораториятын сүрүннүүр научнай үлэһитэ Лена Григорьева.

Бастаан учуонайдар былыргы эһэ кырамтатыгар сибиирдээҕи язва, трихинеллез курдук ыарыы суоҕун бигэргэтэр чинчийиилэри оҥорбуттара. Түмүк үчүгэй буолан, мэйиини хостоһуҥҥа киирдилэр.

"Маннык үчүгэй туруктаах мэйиини биһиги музейбытыгар көрө иликпит. Чинчийии кэнниттэн музейга көрдөрүүгэ туруоруохпут. Араас саастаах кыыл, киһи мэйиилэрин, атын экспонаттары кытта туруоруохпут. Тамографияҕа көрдөххө мэйии туруга үчүгэй, ол эрээри мэйии кытаанах бүрүөтүн арыйа иликпит. Ол иһин тугу да этэр кыахпыт суох. Кэтээн көрөн баран арйыахпыт. ", - диэн Москватааҕы ньиэрбэни үөрэтэр научнай киин 5 №-дээх неврологическай салаатын невролог-бырааһа Максим Андреев иһитиннэрдэ.

Учуонайдар мэйиини таһынан, араас чинчийиигэ эттиктэри эмиэ ыллылар. Тэрээһиҥҥэ араас дойдуттан тиийэ учуонайдар кыттыыны ыллылар. Ол курдук бу чинчийии араб эмираттарын биотехнологическэй пуондата уонна Россия сүрүн учуонайдара холбоһуктаах норуоттар икки ардыларынааҕы научнай семинар иитинэн барда.

Итиэннэ тэрээһиҥҥэ аатырбыт учуонай, саха лайкатын клоннаабыт, Өрөспүүбүлүкэҕэ киэҥник биллэр Хванг Ву Сок эмиэ кыттыыны ылла. Түҥ былыр эһэ эттигиттэн ылыллыбыт клетка үөрэтиллэн, научнай чинчийиилэри ааһан, генетика өттүнэн наука историятыгар киэн хардыы оҥоһуллуоҕа диэн учуонайдар бигэ эрэллээхтэр.