Иван Кривогорницын икки саҥа документальнай киинэтин сүрэхтээтэ

Хартыына көрөөччүгэ хоту аҕыйах ахсааннаах норуоттар сүтэн эрэр кыһалҕаларын көрдөрөр. Итиэннэ тылларын сүтэрэн эрэр омуктары таарыйар. Бастакы киинэ Макар Явункодэ олоҕо диэн. Манна дьүкээгир омугун култууратын сайдыытыгар сүҥкэн кылаатын киллэрбит табаһыт Макар Курилов туһунан кэпсэнэр. Оттон иккис хартыына Улуу Энгэси суолунан диэн эдэр эвенкийка Катя Максимова тунгусовед-учуонай Глафира Василевич суолунан барарын туһунан. 

"Иккис киинэм юкагир табаһытын  Макар Курилов туһунан. Кини өр сылларга табаһытынан үлэлээн баран, эмискэ култуураҕа сыстар. Уонна ырыа, хоһоон суруйар, үҥкүү туруорар. Ол курдук, бу сүтэн эрэр юкагир норуотугар сүрдээх улахан кылааты киллэрэр. Кини оҕолору юкагирдыы тылга үөрэтэр. Ол иһин биһиги эрэлбит киниэхэ улахан. Кини курдук дьон баар буоланнар, бу сүрдээх былыргы, тыһыынчанан сыл анараа өттүгэр бу дойдуга олорбут норуот сүтүө, симэлийиэ суоҕа диэн эрэллээхпит", - диир режиссёр Иван Кривогорницын.

Режиссёр бэйэ чинчийиитигэр кыһалҕалаах боппуруоһу көтөҕөр. Ол курдук бу билиҥҥи аныгы кэмҥэ бэйэ төрөөбүт тылы харыстаан илдьэ сылдьыахха сөп дуо диэн. Документальнай киинэлэр Саха сирин национальнай библиотекатын уонна регионнааҕы кинематограф пуондатын өйөбүллэринэн күн сирин көрдүлэр. Маны тэҥэ киинэлэри көрдөрүү кэмигэр саалаҕа этнограф Глафира Василевич үлэтигэр туһуламмыт ураты быыстапка үлэлээтэ.