Ильмень күөлгэ өлбүт буойуттары кэриэстээтилэр

Аҕа дойдуну көмүскээччилэр күннэригэр, Ил Дархан Айсен Николаев, Ил Түмэн депутаттара, уопсастыбыннас "Ильмень үрдүнэн туруйалар" искибиэргэ буойуттары кэриэстээн, сибэкки дьөрбөтүн уурдулар. История кэрэһэлииринэн, 80 сыл аннараа өттүгэр, 1943 сыл олунньу 23 күнүгэр Саха сирин хорсун уолаттара, 19-с хайыһар биригээдэтин буойуттара Ильмень күөлгэ кырыктаах кыргыһыыга олохторун толук уурбуттара.

"Саха сириттэн барбыт саха буойуттара, бэйэлэрин ааттарын Аҕа дойду сэриитин историятыгар хаһан да умнуллубат гына, чаҕылхайдык историяҕа хаалларбыттара. Биһиги аатырбыт снайпердарбыт бүтүн фронт, дойду үрдүнэн   ааттара ааттаммыта. Хайыһардьыттарбыт биригээдэлэрэ, кинилэр тулуурдара, хорсун быһыылара улаханнык дуораһыйбыта. Бүтүн Сталинградскай фронт Гавриил Протодьяконов аатын киэн тутта ааттыыр этэ. Сталинград куорат көмүскэлигэр кини өстөөх иннигэр ыга киирэн, сэриилэһэр ньыманы толкуйдаабытын туһунан, кэнники бу Сталинград легендарнай хамандыыра, маршал Чуйков суруйан турар. Онтон да атын үгүс холобура суох хорсун быһыылары саха дьоно көрдөрбүттэрэ. Онон бу Ильменьҥа турар паамытынньык аҥардас Ильмень дьоруойдарыгар эрэ буолбакка, Аҕа дойдуну көмүскүүр улуу сэриигэ Саха сириттэн барбыт уонна дойдуларын туһугар бэйэлэрин тыыннарын толук уурбут биһиги тыһыынчанан ахсааннаах  сахабыт дьонун туһугар. Ол буойуттар үтүө ааттарыгар, сырдык кэриэстэригэр биһиги мустан турабыт", - диэн Ил Түмэн бэрэссэдээтэлин бастакы солбуйааччы Александр Жирков иһитиннэрдэ.

Бу кыргыһыы өрөспүүбүлүкэбит олохтоохторугар ыар сүтүк буолбута. Манна биригээдэҕэ 2 тыһ. тахса саллаат баарыттан, 600 тахсата Саха сирин олохтоохторо этэ. Онон хас сыл ахсын, олунньу 23 күнүгэр, Ильмен күөлгэ буолбут кыргыһыы буойуттарын санаан-ахтан ааһабыт.