Саһыл Сыһыыга гражданскай сэрии бүтэһик кыргыһыыта буолбута 100 сыла

Аммаҕа  үс аҥаар ый төгүрүктээһиҥҥэ түбэспит кыһылларга көмөҕө баран иһэр Иван Строд хамандыырдаах кыһыл этэрээтин, Анатолий Пепеляев генераллаах үрүҥ этэрээтэ аара тоһуйар. Строд  Саһыл Сыһыыга тохтоон турдаҕына сарсыарда эрдэ саба түһэллэр, ол эрэн  кытыы балаҕаҥҥа сытар кыһыллар элбэх өлүүнү көрсөн, туран кимэн киириини тохтотоллор. Ол кэнниттэн иккис улахан киирсиигэ, Пепеляев этэрээтэ эмиэ элбэх киһини сүтэрэр. Ол иһин атааканы тохтотоллор уонна төгүрүктээн сыталлар. Бу кэмҥэ, Иван Строд бэйэтэ улаханнык икки төгүл бааһырар. Ол да сытан хамаандалыырын тохтоппот.

"Бүтэһигэр, Пепеляев кинилэргэ тыл ыытар, Чурапчыга баар пушканы былдьаатыбыт, сотору биһиги ону аҕалыахпыт диэн. Ону бары мунньахтаан баран, иин хастан туох баар ботуруоннарын, снарядтарын, гранаталарын быраҕаллар. Киирдэхтэринэ, тоҕу тэптэрэн өлүөхпүт диэн. Бу харса суох хорсун быһыы. Аны туран, окуопаларын ытыалыылларыттан алдьанан барбытыгар, балбаах, ынах-сылгы өлүгүн быыһыгар, өлбүт доҕотторун тоҥорон баран таһаараннар, быыһы бүөлүүллэр. Кырдьык, саныахха ынырык", - диэн историк   Владимир Пестерев чахчыттан үллэстэр.

18 хонуктаах охсуһууга Строд этэрээтэ Пепеляев бары былаанын алдьаппыта. Онон кини олунньу 17 күнүгэр Дьокуускайга кимэн киирэр туһунан таһаарбыт бирикээһэ туолбатаҕа.

"Бу Ян Строд хамандыырдаах кыһыл этэрээт 18 күн, олунньу 16 күнүттэн саҕалаан, кулун тутар 4 күнүгэр диэри, 50 кыраадыс тымныыга аһа-таҥаһа суох хаайтаран олороннор, Пепеляев этэрээтин тохтоппуттара. Пепеляев Саһыл Сыһыыны сатаан ылбакка, хотторон, чугуйарга күһэллибитэ. Саха сирэ эрэ буолбакка, бүттүүн Сибиир, оччотооҕу Сэбиэскэй союз үрдүнэн барытынан киэҥник биллибитэ, тарҕаммыта", - диэн салҕыы историк Владимир Пестерев кэпсээтэ.

Онтон 2018 сыллаахха гражданскай сэрии кэмигэр утарыта турбут күүстэр Иван Строд уонна Анатолий Пепеляев сиэттэрэ Саха сиригэр көрсөн, "Иллээх буолууга уһун айан" кэмпириэнсийэҕэ кыттыыны ылбыттара.