"Нэһилиэк сайдыыта-ыччат илиитигэр"  дьылабыай оонньуу

Бу күннэргэ Горнай Бэрдьигэстээҕэр эдэр исписэлиистэр ортолоругар, бырайыак толкуйдааһыныгар дьылабыай оонньуу буолла. Тэрээһин быйыл иккис төгүлүн ыытыллар, күрэскэ уопсайа 35 ыччат 5 хамаандаҕа арахсан кытынна.

Бэрдьигэстээх нэһилиэгин ыччатын ортотугар иккис сылын ыытыллар "Нэһилиэк сайдыыта-ыччат илиитигэр" диэн ааттаах  дьылабыай оонньуу, араас тэрилтэлэртэн 35 эдэр дьону түмтэ. Кыттааччылар сэрэбиэй быһыытынан, 7  киһилээх 5 хамаандаҕа арахсан, күн устата култуура, туризм, патриотизм курдук хайысхаларга бырайыактары толкуйдаатылар.

Араас хайысхаҕа үлэлии сылдьар эдэр исписэллистэр  толкуйдаабыт бырайыактара сэргэх уонна сонун буоллулар. Бырайыактары сыаналааһыҥҥа "Талакаан" хампаанньа салайааччыта Василий Николаев, СӨ Ыччакка министиэристибэтин исписэлииһэ  Дмитрий Куприянов,  "Инвестдорстрой" ХЭТ генеральнай дириэктэрэ Яков Сидоров, уо.д.а Дьокуускай куоракка араас хайысхаҕа ситиһиилээхтик үлэлии-хамсыы  сылдьар биир дойдулаахтарбыт  экспертээтилэр.

"Хамнаадалар олус диэн күүстээхтэр. Үчүгэй бырайыак таларбытыгар ыарырҕаппыппыт. Барыта кыаллар, сатанар бырайыактар. Биһиги санааларбытын барытын истэннэр, бэйэлэрин өйдөбүллэрин үчүгэйдик тиэрдэннэр интириэстээхтик кыттыбыттарыттан үөрдүбүт", - диэн СӨ ыччат дьыалаларыгар уонна социальнай коммуникацияҕа министиэристибэтин исписэлииһэ, "Росмолодёжь" тэриллии федеральнай эспиэрэ Дмитрий Куприянов иһитиннэрдэ.

"БердКут" хамаанда Бэрдьигэстээххэ Пейнтбол уонна панорамнай тир оҥорор туһунан бырайыагы киллэрэн көмүскээтэ. Оттон "Хотой" хамаандата  эдэр ыччакка анаан, спорт ураты көрүҥнэригэр хас да күннээх аһаҕас халлааҥҥа ыытыллар бэстибээли тэрийиини толкуйдаабыт. Хас биирдии хамаанда чаҕылхай ыччаттара, бу күн  анал номинацияларга тигистилэр. Ол курдук  "Генератор идеи" Саяна Самсонова, "Лидерскай потенциал" Дьулустаан Филиппов, "Душа команды" Күндүүнэ Колесова, "Лучший командир" Нури Худайбердиев, "Эффективный игрок"  Олеся Захарова буоллулар.

Күрэх  түмүгүнэн,  3 миэстэҕэ  сүдү биир дойдулаах худуоһунньукпут, Афанасий Николаевич Осипов, хартыыналарыгар уруһуйдаабыт сирдэрин маршрутунан, ыччаты сырытыннарыы бырайыактаах "Чыпчаал" хамаанда буолла.

"Афанасий Осипов Гемалай хайаларыгар тиийэ тахсан, хартыыналарын үйэтиппитэ. Ону бу эдэр ыччат афанасий Николаевич сылдьыбыт сирдэринэн бырайыак оҥоһуллаары турар", - диир 3-миэстэлээх "Чыпчаал" хамаанда чилиэнэ  Күндүүнэ Колесова.

Иккис миэстэҕэ "Синие" хамаанда куар код көмөтүнэн эдэр ыччакка, оҕолорго төрөөбүт сири билиһиннэрии бырайыага таҕыста. Хамаанда хапытаана  Олеся Захарова  бэлиэ сирдэргэ, улууссалар ааттарыгар сыһыаран, куар кодтаах карточкалары оҥорон бырайыакпытыгар киллэрдибит диэн этэр.

Уонна бастакы миэстэни "Муора таһымыттан, 220 миэтэрэ үрдүккэ" диэн бырайыактаах "Бордовайдар" хамаандалара ылла. Бу Бэрдьигэстээҕи  15 миэтирэ үөһээттэн көрөр смотровой башняны оҥорор туһунан бырайыак.  

"Горнай улууһа Саха сиригэр саамай үрдүк тһымнаах сиргэ турар. Ол иһин смотровой башня тутааһыҥҥа бырайыак суруйдубут. Башнябыт стендалардаах  буолар.  Стендаларга куар куодунан Бэрдьигэстээх бэлиэ сирдэрин көрдөрөр дорожнай маршруттардаах", - диэн 1 миэстэлээх "Бордовые" хамаанда  хапытаана Семен Жирков кэпсээтэ.

Кыайыылаах бырайыактар олоххо киирэллэригэр, "Талакаан" хампаанньа салайааччыта Василий Николаев уонна  "Инвестдорстрой" ХЭТ генеральнай дириэктэрэ Яков Сидоров спонсордыырга бэлэмнэрин биллэрдилэр.