Госавтоинспекция бэрэбиэркэ үлэтин салҕыы күүһүрдэр

Госавтоинспекция олунньу 20 күнүттэн 26 күнүгэр диэри бэрэбиэркэлиир үлэтин күүһүрдэр. Сүрүн болҕомтону аһыы утаҕы испит суоппардарга уонна суол быраабылатын кэһээччилэргэ ууруохтара. Маны тэҥэ, федеральнай трассаларга, айан суолларга ГАИ көһө сылдьар пууннара үлэлиэхтэрэ, сырыыны хонтуруоллуохтара.

Суолга-иискэ куттала суох айаны хааччыйар инниттэн, маассабай бэрэбиэркэлэри инспиэктэрдэр сотору-сотору тэрийэллэр. Эрдэ улахан болҕомто, сүрүннээн өрөбүл күннэргэ ууруллар эбит буоллаҕына, сыл саҥатыттан рейдэлэр түһүмэҕинэн ыытыллаллар. Ол курдук олунньу ый саҥатыгар суол быраабылатын кэһэн айаначчылары тутууга үлэ барбыта. Бу түмүгүнэн, тыһыынчанан административнай боротокуолу толордулар.

"4600 тахса административнай боротокуол толоруллубута, 56 суоппар итирик тутуллубута, 4 суоппар хос итирик тутуллубута. 105 киһи тимир көлөнү ыытар бырааба суох административнай кодекска түбэһэннэр тохтотуллубуттара.  Билигин салҕыы күүһүрдүллүбүт рейдэлэр бара тураллар", - диэн суолга-иискэ куттала суох буолууну хааччыйар СӨ государственнай инспиэксийэтин пропагандаҕа инспиэктэрэ Күннэй Иванова иһитиннэрэр.

Бу күннэртэн саҕалаан, олунньу 26 күнүгэр диэри  сэрэтии тэрээһинэ эмиэ былаан быһыытынан тэриллэр. Бэрэбиэркэлиир рейдэ үлэлэрэ күүһүрүөхтэрэ.  Онон суол-иис кыттааччылара, ыытааччылар эрэ буолакка, сатыы сылдьааччылар  эмиэ, айан суолугар бэрт сэрэхтээх буоларгытыгар ыҥыраллар. Статистика чахчыта сыллата тэҥинэн, эбэтэр үрдээбит сыыппараны көрдөрөр, онон кыра да аччааһын ситиһии.

Аҥардас бу ааспыт өрөбүл күннэргэ 8 суол саахала таҕыста. Онтон түөрдүгэр дьону түҥнэри көтүү уонна массыыналар утары харсыһан, уопсайа 9 киһи эчэйдэ, онтон иккитэ оҕо. Күннэтэ маннык быһылааннар тахса турар буоланнар, болҕомто сатыы да сылдьаччы, айаннааччы да өттүттэн хас да бүк үрдүөн наада. 

Быһылааннар тахсар сүрүн төрүөттэринэн, ыытааччылар куттала суох тургэни тутуспаттарыттан, туһааннаах  туорааһыннарга сатыы дьону ыыппаттарыттан,  ону тэҥэ светофор көҥүлэ суох уотугар айанныылларыттан буолар. Маны тэҥэ, улахан трассаларга массыыналар утарыта хайысхаларга тахсан биэрэллэрэ эмиэ элбэхтик бэлиэтэнэр. Хас биирдии быһылаан - бу киһи олоҕо.

"Билигин Бүлүү, Лена, Халыма федеральнай-региональнай суолларга инспиэктэрдэр күүскэ үлэлии тураллар. Суолга бэрээдэги эрэ буолбакка, дьоҥҥо-сэргэҕэ көмөлөһөллөр, профилактическай көмө оҥороллор", - диир суолга-иискэ куттала суох буолууну хааччыйар СӨ государственнай инспиэксийэтин пропагандаҕа инспиэктэрэ Күннэй Иванова.

Үүнээри турар бырааһынньыктааҕы өрөбүл күннэргэ куорат да, федеральнай да суолларга, ГАИ инспиэктэрдэрэ маассабай бэрэбиэркэни төгүрүк суукка устата тэрийиэхтэрэ