Любовь Дьячковская: "Учуутал бары өттүнэн бары холобур буолуохтаах"

Бу сыл дойдуга Уһуйааччы сылынан биллэриллибитэ. Онон үөрэҕирии эйгэтигэр араас тэрээһиннэр ыытыллаллар, оскуолалар истэригэр эдэрдэри уопуттаах учууталларга сыһыаран үлэ - хамнас тэтимнээхтик саҕаланна. Тулагы агро хайысхалаах оскуолатыгар "Уһуйааччы сүбэтэ" тэрилиннэ, учууталлары бөлөхтөрүнэн араардылар. Бу үлэни - хамнаһы Людмила Дьячковскайа салайар.

Тулагы оскуолатын 3 "б" кылааһыгар уруок сахалыы хомоҕой хоһоонтон саҕаланар. Учуутал Любовь Дьячковская 40 тахса сыллаах баай уопутун, киэҥ билиитин бу кырачааннарга иҥэрэр. 3 "б" кылаас сыллата оскуола үрдүнэн "Бастыҥ кылаас" аатын эрэллээхтик ылар. Тоҕо диэтэххэ Любовь Григорьевна оҕолоро үөрэҕи уонна эбии дьарыгы тэҥинэн тутан сайдаллар. 

Любовь Григорьевна кылааһа куруутун математика күүстээх буолар. Ол эрэн уопуттаах учуутал этэринэн оҕо аҥардас үөрэххэ эрэ умса түспэккэ хайаан да эбии дьарыктаах буолуохтаах.  Онон кылаас үөрэнээччитэ барыта  үҥкүү, ырыа дьарыктарыгар сылдьар.

"Математика Москва учуонайын кытта билсэммин, кини оҕону түргэнник ааҕар-суоттуур ньыматын сүбэлэттэрбитим. Итиэннэ кини методикатын үлэбэр туһанабын", - диэн П.И. Кочнев аатынан Тулагы орто оскуолатын алын кылаас учуутала Любовь Дьячковская үллэстэр.

Любовь Дьячковская уруогун кэннэ эдэр учууталлары кытта үлэҕэ тиэтэйэр. Кини быйыл дойдуга биллэриллибит Уһуйааччы сылыгар кылаас салайааччыларын сүбэлиэхтээх - амалыахтаах. Маны таһынан бэйэтигэр сыһыарыллыбыт эмиэ хас да учууталлаах.

Варвара Наумова, П.И. Кочнев аатынан Тулагы орто оскуолатын история учуутала: "Мин Тулагы оскуолатын бүтэрбитим, Любовь Григорьевна миигин үөрэппитэ. Ол иһин учууталбытын кытта тэҥҥэ үлэлии сылдьарбытыттан олус диэн үөрэбит".

Наталья Кузьмина, П.И. Кочнев аатынан Тулагы орто оскуолатын алын кылаас учуутала: "Тугу эрэ саҥаны билээри гыннахпына наар Любовь Григорьевнаҕа барабын. Кини наар новаторскай көрүүлээх."

Ол курдук Любовь Дьячковская үлэлиирин тухары уһуйааччы - бастаан үлэлиирин саҕана Тулагы оскуолатын солбуллубат пионер баһаатайа, онтон өр сылларга дириэктэри иитэр үлэҕэ солбуйааччы. "Онон кини оскуола Аҕа уһуйааччыта буолара саарбаҕа суох этэ" диэн үөлээннэхтэрэ үллэстэллэр.

"Уһуйааччы холобур буолар учуутал эрэ буолуо суохтаах, ону тэҥэ киһи быһыытынан эмиэ холобур буолуохтаа", - Любовь Григорьевна санаатын эдэр исписэлиистэргэ туһаайда.

Күн бүгүн аҥардас тулагы оскуолатыгар Любовь ДЬячковская үөрэппит 17 оҕото учууталлыы сылдьар. хайа баҕар учууталга үтэтин түмүгэ махталлаах уонна ситиһиилээх үөрэнээччилэр.

Оҕолор сынньалаҥ бириэмэтигэр тыксаан диэн сахалыы осктуол оонньуутугар күрэхтэһэллэр. Маннык кылааска сонунтан сонун дьарык уларыйар. Бу төрөппүттэри кытта үлэ түмүгэ.