Култуура киинэ тыа сиригэр дьону түмэр, сомоҕолуур сир

Мииринэй оройуонун Сулдьукээригэр ааспыт уйэҕэ тутуллубут кулууб дьиэтигэр күн бүгүҥҥэ диэри үлэ барар. Хас эмэ сылы быһа олохтоохтор саҥа эбийиэги туруорсубуттара, онтон быйыл дьыала оннуттан хамсаабыкка дылы буолла.

"Алаас хотуттара" фольклорнай ырыа ансаамбыла Сүлдьүкээр далбардарын түмэр. Аан дойду, Россия таһымнаах куонкурустар кыайыылахтара, Мииринэй оройуонун биир тарбахха баттаннар, ураты тыыннаах түмсүүтэ манна "Биракан" култуура киинигэр  түмсэр. Бөлөх кыттыыылаахтара ытык сынньалаҥнарыгар олорор далбардар.

Ксения Саввинова, Алаас хотуттара" бөлөх чилиэнэ: "Үгүс элбэх күрэхтэргэ кыттабыт, имэстэлэһэбит. Бөлөхпүтүгэр нэһилиэк киэн туттар үлэһит дьоно түмсэр. Ол курдук эрдэ пенсияҕа барыахтарын иннинэ  учууталлар, уһуйааччылар, маҕаһыын үлэһиттэрэ бааллар".

"Биракан" култуура киинэ нэһилиэги кытары тэҥҥэ 1956 сыллаахха төрүттэммит. Бастаан кыра муннук курдук тэриллэн, билигин бүтүн култуурунай киин, эбэҥкилэр култуураларын тэнитэр, тарҕатар сиринэн ааҕыллар. Биир сүрүн үлэ - нэһилиэнньэни ааҕыыга угуйуу. Сүлдьүкээргэ үөрэҕин бүтэрэн кэлэн үлэлии сылдьар Анжелика Алексеева ааҕааччыларыгар бэйэлэрин дойдуларын тарҕатарга сыалланан үлэлиир. Манна араас тематическай биэчэрдэр, көрсүһүүлэр ааһаллар.

Анжелика Алексеева, Сүлдьүкээр библиотекатын салайааччыта: "Бибилитиэкбитигэр түмэл муннуга баар. Манна биһиги өбүгэлэрбит тутта сылдьыбыт маллара – саллара көрдөрүүгэ тураллар".

Күн бүгүн култуура киинэ 19 түмүсүүнү, нэһилиэк сайдыытыгар сыаллатан үлэлэтэр. Оскуола саастаах оҕолортон саҕалаан, аҕам саастаах дьоҥҥо тиийэ. Манна биир сүрүн миэстэни декоративно-прикладной түмсүү ылар. Бииртэн биир эриэккэс оҥоһуктары, таҥаһы-сабы, киэргэллэри, олбохтору киһи сөҕө-махтайа көрөр. Бу буоллаҕа эбэҥки култууратын үүнэр көлүөнэҕэ, дьоҥҥо тарҕатыы биир көрүҥэ. Маны барытын "Биракан" салайааччыта, эдэр эрчимнээх Галина Неустроева иилээн-саҕалаан ыытар эбит.

Галина Неустроева, "Биракан" култуура дьиэтин салайааччыта: "Кулууппут төһө да эргэ буоллар материально-техническэй базабыт наһаа куһаҕана суох. Мииринэй оройуонун былааныгар киирэн саҥа кулууп тутуллуохтаах".

Бу курдук нэһилиэнньэни кытары бииргэ, эрчимнээхтик үлэлии сылдьар Сүлдьүкээрдэр  аны икки  сылынан  сана култуура киинин эрэнэ күүтэллэр.