Национальнай библиотека кэм ирдэбилинэн, саҥа технологиялары хамаҕатык туһанар

Библиотекаҕа өрөмүөн кэннэ Саҥа саалалар уонна сынньанар хостор баар буоллулар. Маны сэргэ сыыппараҕа көһөрүү киинэ арыллан улэлээн эрэр.

Тэтимнээх сайдыы кэмигэр, олох бары ирдэбилигэр эппиэттэһэр туһуттан, аныгы кэмэ технологиялара киирэллэр. Ол курдук соторутааҕыта библиотека саҥа хайысханы арыйан үлэлэттэ. Саҥа киин сүрүн соруга - саха төрүт тылын уонна култуурнай нэһилиэстибэтин сыыппараҕа көһөрүү, тириэрдии буолар.

Сыыппараҕа көһөрөр киин үлэлиир хайысхата киэн. Кииҥҥэ библиотека үлэһиттэрин таһынан, научнай уопсустуба, ученайдар, кыраайы үөрэтээччилэр, программистар биир ситимнээхтик үлэлииллэр.

Василий Васильев сүрүн үлэтэ музей экспонаттарын сыыппараҕа көһөрүү буолар. Ол курдук 3Д сканирования нөҥүө ымпыгар чымпыгар диэри түһэрэр. Ол кэннэ экспонат историятын сурукка киллэрэн наардаан библиотека сайтыгар угар.

Саха норуотун баай нэһилиэстибэтин харыстаан кэлэр көлүөнэҕэ хаалларар сыалтан сыыппараҕа көһөруу үлэтэ барар.   Манна фольклортан саҕалаан, музей экспонаттара, чааһынай коллекциалар, кинигэлэр, Саха сиригэр олорор норуоттар тыллара, уус номохторо түмүллүөҕэ.Маны барытын кэмпьэтерга киллэрии үйэлэргэ хаалларар биир бигэ ньыма буолар. 

Билиҥҥи кэмҥэ ааҕааччы дьиэтиттэн да олорон норуотун култууратын, истоиятын билэригэр, үөрэтэригэр бары усулуобуйаны олохтуурга библиотека үлэһиттэрэ кыһаллаллар. Ааҕааччы интэриэһин тардарга, дьиэни уоту тупсаҕай оҥорор инниттэн өрөмүөн үлэтэ салҕанар.Барыта ситэн-хотон арылыннаҕына, бары салаалары ситимнээх биир кэлим аныгы кэм ааҕар дьиэтэ буолуоҕа.