Василий Дьячковскай: “Дарыктыыр уолаттарым – мин тутаах дьонум”

Быйыл дойдуга Уһуйааччы сыла. Педагог идэтин таһымын үрдэтии сыл сүрүн соруга.  Ол инниттэн холобур буолар дьон билиилэрин уонна өр сыллаах уопуттарын эдэрдэри кытта үллэстиилэрин суолтата улаатыахтаах. Оннук дьоннортон биирдэстэрэ үгүс ааттаах-суоллаах спортсменнары уонна треннердары иитэн таһаарбыт Василий Дьячковскай.

Спортивнай саала муннугар кып-кыра сиртэн дойду, аан дойду ааттаах - суоллаах спортсменнара үүнэн тахсыбыттара. Дьарыктанар сир омуннаабакка эттэххэ 4х6 миэтэрэ. Гиирэ спордугар саха сирин ситиһиитин сүрүн кистэлэҥэ - дэҥҥэ көстөр бастыҥ тренер. Василий Дьячковскай 40 тахса сыл бу көрүҥҥэ ыччаты эрчийэн кэллэ. Онтон кини этэринэн кистэлэҥ бэриниилээх буолууга уонна тапталга сытар.

"Саамай сүрүнэ биһиги дьарыктанар сөрҥмүтүн таптыахтаахпыт. Гиирэ спорда олус ыарахан. Уолаттар биирдии дьарыкка 25 туоннаҕа тиийэ аннаьллар. Онон күүстээх тутулуурдаах уонна дьиҥнээхтии бэриниилээх эрэ киһи тулуйар", - диэн  СӨ гиирэ спордугар сүрүн тренерэ, Россия үтүөлээх тренерэ Василий Дьячковскай диэн этэр.

Россия чемпионатыгар сүүмэрдэниигэ барыах иннинээҕи дьарык билигин барар. Уһуйааччы уолаттарын кытта тэбис тэҥҥэ сааһыгар сөбө суох чэпчэкитин туттан эрчиллэр. Кини хас биирдии иитиллээччитигэр барсар ньымалары тобулбутун бэйэ холобуругар көрдөрөр.

"Мин хаһан да аптрытыаппынан өттөйбөппүн. Кинилэри кытта биир хамаандабыт. Бары мин тутаах дьоннорум. Уолаттарбын кытта мин тэҥҥэ оҕо буолабын", - диэн Василий Николаевич дьарыктана сылдьар уолаттарын астына көрө кэпсиир.

Бу эрчиллэ сылдьааччылартан үһэ тренер. Никандр Тимофеев - Покровскайга оҕолору эрчийэр, онтон Владислав Захаров уонна Егор Попов Чурапчытааҕы оҕо спорт оскуолатыгар ситиһиилээхтик үлэлииллэр. Кинилэр уһуйааччыларын Василий Дьячковскай үөрэтэр ньымаларын бэйэлэрин үөрэнээччилэригэр тарҕаталлар. Бу уолаттар курдук тренер буолбут оҕото үгүс. Онон үтүөлээх тренер билиитэ өрөспүүбүлүкэ бүттүүнүгэр тарҕанар.

"Василий Николаевич миигин үөрэппит техникатынан оҕолорбун үөрэтэбин. Киниттэн куруутун сүбэлэтэбин. Ситиһиилэр бааллар, онон үлэ барар", - диэн уһуйан таһаарбыт уола  Чурапчытааҕы оҕо спорт оскуолатын тренерэ, Россия спордун маастара Егор  Попов этэр.

Утумнаах үлэ  түмүгэ - ситиһии. Гиирэ- спорт саамай сайдыбыт көрүҥэ. Онон күрэстэһии олус үрдүк. Маныаха биһиги Михаил Саввинов, Дмитрий Михалев уонна Владимир Оленов курдук аан дойду кылаастаах маастардарбытын киэн тутта ааттаталыыбыт. Бу кинилэр бары Василий Дьячковскай иитиллээччилэрэ. Ситиһии сыралаах үлэттэн тахсар. Уопуттаах тренер хас күн аайы хас биирдии спортсмеҥҥа дьарыктанар былаан оҥорор. Манна күннээҕи турук сүрүннээн учуоттанар. Василий Николаевич «уолаттарым залга киирэн истэхтэринэ ыраахтан тута хайдах утуйбуттарын кытта билэбин» диэн этэр.   

Бу курдук василий Дьячковскай күннэтэ Саха сиригэр гиирэ спорда сайдыытыгар туруулаһар.