Саха сирин учуонайдары искэҥ килиэккэтин алдьатар чинчийиилэри оҥороллор

Ирина Николаева наука эйгэтигэр үлэлээбитэ сэттэ сыл буолла. Кини сүрүн үлэтэ -  килиэккэни үөрэтии. Научнай чинчийиинэн дьарыктанарын таһынан, кини устудьуоннары уонна оскуола оҕолорун кытта үлэлэһэр. Холобура, доруобай киһи хаанын ылан 10 күн иһигэр дендриднай килиэккэҕэ үүннэрэн, уопут оҥорон үөрэтэр.

Ирина Николаева, ХИФУ "Медицинские биотехнологии" ыччат билимин лабораториятын научнай үлэһитэ: "Доруобай киһи хааныттан килиэккэ үүннэрэбит. Онтубут инникитин онковакцина курдук туһаныллыахтаах. Бу чинчийиигэ устудьуоннар кыттыһаллар".

ХИФУ иһинэн медицинскэй биотехнологияны үөрэтэр лаборатория 2017 сылтан үлэлиир. Манна сыллата наукаҕа саҥа арыйыылар тахсаллар. Лаборатория медиктары кытта ыкса ситимнээхтик үлэлиир. Ол курдук  үлүйбүт эбэтэр уокка сиэппит киһи тириитэ түргэнник чөлүгэр түһүүтүгэр анаан эбии килиэккэ үүннэрэн таһаарар. Маны таһынан лаборатория чинчийэр үөрэтэр хайысхата киэҥ.

Иван Троев, ХИФУ "Медицинские биотехнологии" ыччат билимин лабораториятын салайааччыта: "Биир улахан чинчийэр хайысхабыт – килиэккэлэр көмөлөрүнэн быар үлэтин хааччыйыы. Судургутук быһаардахха бүөрдээх дьоҥҥо диализ курдук быарга оҥоһуллуохтаах".

Эдэр ыччаты наукаҕа сыһыарыы лаборатория сүрүн соруга буолар. Радамир Готовцев ХИФУ медицинскэй институтун магистрана. Кини  лабараанынан үлэлээбитэ сыл аҥара буолла. Радамир искэҥ килиэккэтин чинчийэр. Онон диссертациятын  бу тиэмэҕэ суруйар.

Биотехнологияны үөрэтэр олус уустук. Биир научнай чинчийии хас эмэ сыл устата салҕанар. Билигин лаборатория искэҥ клеткатын чинчийиигэ ылсан үлэлиир. Түмүгэр онковакцина оҥорон таһаарар сорук турар.

Иван Троев, ХИФУ "Медицинские биотехнологии" ыччат билимин лабораториятын салайааччыта: "Дендриднай килиэккэ искэҥ килиэккэлэрин сиир уонна онтон салҕыы атын иммуннай килиэккэлэргэ искэҥ килиэккэлэрин сииллэрин курдук сорудахтыыр. Ол килиэккэлэри биһиги үүннэрэн баһаарабыт. Билигин чинчийии үлэтэ барар. Онтон салҕыы, бу ньыма көдьүүстээҕин дакаастаатахпытына, вакцина буолан тахсыахтаах".

Лаборатория араас граннарга, күрэхтэрг куруук кыттар. Онон сылын аайы техническэй базатын саҥардар. Инникитин өссө кэҥээн доруобуйа харыстабылын эйгэтигэр научнай чийииилэри оҥорор былааннаах.