Хочуолунайдары тупсарыыга 16 миллиард көрүлүннэ

Оттук кэмэ үгэннээн турар. Мииринэй оройуонун Сүлдьүкээригэр томороон тымныылар намырааннар, олох-дьаһах хомунаалынай хаһаайыстыбатын үлэһиттэрэ өрө тыыннылар. Тустаах нэһилиэккэ 90% олохтоохтор киин ититэр ситимҥэ холбонон олороллор, онон бу хайысхаҕа үлэ күргүөмнээҕэ барар.

90-с сылларга үлэҕэ киирбит хочуолунай тигинэччи үлэлии турар. Маҥнайгы сылларга икки улахан хочуол турбута, онтон 6 сылынан өссө эбии икки улахан кыамтаалаах оһохтор тураннар, күн бүгүн Сүльдүкээр олохтоохторо бары кэриэтэ оһох оттубат дьоллоохтор. Чоҕунан  ититиллэр  эбийиэктэр кыһыны этэҥҥэ ортолоппуттар.

"Кыстыкпытын этэҥҥэ туораан эрэбит, улахан алдьаныы суох. Кыһын 2.5 тыһ. туоннаны оттобут. Онтон кыһыҥҥы суол аһылыннаҕына Ленскэйтэн таһыллар", - диэн кыстык хаамыытын хочуолунай салайааччыта Леонид Саввинов үллэстэр.

Чахчы, биллэн турар, кыһыҥҥы эрэ кэмҥэ оттук кэлэрэ үгүс күчүмэҕэйдэри үөскэттэр. Ол эрэн уолаттар бэриниилээх үлэлэринэн олохтоохторго итиини биэрэ олороллор. Быйыл соччото суох хаачыстыбалаах чох кэлэн, сорох кэмнэргэ ыгым кэмнэр тирээн кэлбиттэрэ. Ону ол диэбэккэ, норуот сөбүлээн ааттыыр ПАКУ үлэһиттэрэ, тыйыс тымныыны этэҥҥэ туораппыттар.

Билигин, кыһыҥҥы муус суола турар буолан, Ленскэй оройуонун диэкиттэн чох тигинэччи кэлэ турар. Кэлэр сылы таһаарар оттук улахан аҥара кэлбит.

Кыһыҥҥы суол арыллан, билигин Сүлдьүкээргэ чоҕу тиэйии тэтимнээхтик барар. Күн бүгүн 2 тыһ. тахса туонна кэллэ.

Биллэн турар, 90-с сыллартан үлэлии турар хочуолунай эргэрэн, саппаҕыран, манна сөргүтүү үлэлэрэ кэлэр кэмэ тирээбит. Быйыл саҥа үүммүт 2023 сылга хочуолунайга саҥа тэрили туруоруу үлэлэрэ ыыттыллара быллааннанар.

"Быйылгы олус тымныы күннэри үчүгэй чох кэлэн этэҥҥэ аастыбыт. Модернизация бырагыраамматыгар хапсаммыт саҥа оһохтор кэлиэхтээхтэр", - диэн "Садын национальнай нэһилиэк" МТ баһылыга Вера Афанасьева иһитиннэрэр.

Уопсайынан Саха сирин үрдүнэн быйыл бу эйгэҕэ улахан саҥардыы үлэтэ барара былааннанар. Дойду быраабытылыстыбатын ыйааҕынан 14 эрэгийиэҥҥэ бу үлэлэр ыытыллыахтара, Саха сирэ ол иһигэр хапсан,  16 млрд солкуобай үп тыырыллыбыт. Бу үлэ чэрчитинэн 450 тыһыынча дьон олорор усулуобуйата тупсуоҕа.