Сатыы сылдьар дьон суол саахалыгар түбэһиитэ үксүүр

Дьокуускай куоракка суол саахалын тахсыытын үрдээһинэ бэлиэтэнэр. Ол курдук сүрүннээн сатыы сылдьар дьону,  ол иһигэр сокуоннай сааһын туола илик оҕолору үнтү көтөөһүн түгэнэ бу сыл саҕаланыаҕыттан элбэхтик бэлиэтэннэ. Хомолтолоох статистиканы аччатар туһуттан иниспиэктэрдэр хас нэдиэлэ ахсын оҕолору кытары тустаах үлэни ыыталлар.

Иниспиэктэрдэр  учууталлары кытары оҕолору таҥыннартаан, таһырдьа тахсан суол быраабылатын кэпсииллэр. Бу сырыыга ГИБДД үлэһиттэрэ өрөспүүбүлүкэтээҕи коррекционнай оскуола-инэринээт оҕолоругар ыалдьыттаатылар. Үөрэнээччилэр болҕомтолорун тардаары иитии-үөрэтии чааһа оонньуу халыыптаах ыытыллар уонна улахан дьон бэйэтин холобуругар олоҕурар.

Виктория Петрова, өрөспүүбүлүкэтээҕи коррекционнай оскуола-интэринээт дириэктэрин иитэр үлэҕэ солбуйааччы: "Оҕо олоҕо биһигиттэн, улахан дьонтон, тутулуктаах. Ол иһин бары тэҥҥэ үлэлиэхтээхпит".

Оҕолор уулуссаҕа тахсан оскуолаларын таһыгар баар суолу хайдах туоруохтаахтарын туһунан үөрэҕи ааһаллар. Холобур, манна дьон туорууругар аналлаах светофор суох. Ол аата ааһан иһэр массыыналарга болҕомто күүскэ ууруллуохтаах. Оҕолор бэйэлэрэ оҥорбут "Суоппарга махтал" диэн плакаттарын тутан суолу туорууллар. Бу курдук тустаах үөрэҕи ГИББД үлэһиттэрэ хас биирдии оскуолаҕа ыыталлар.

Владилена Охлопкова, Дьокуускайдааҕы суол – иис иниспиэксийэтин нэһилинньэни кытары үлэҕэ салаатын салайааччы: "Баҕалаах оҕолору кытары суолга тахсаммыт, сөптөөхтүк туорааһын хайдах буолуохтааҕын көрдөрдүбүт, дьиҥ олоххо диэбит курдук. Ону кытары "Суоппарга махтанабыт» диэн акция оҥордубут. Онно оҕолор бэйэлэрэ оҥорбут плакаттарын тутан таҕыстыбыт итиэннэ махтал тиэртибит, суоппардар наһаа үөрдүлэр. Маннык профилактика биһиэхэ бастакы буолбатах, хас нэдиэлэ ахсын оҕолору кытары араас үлэлэри ыытабыт".

Хомойуох иһин киин куорат уулуссаларыгар сыл саҕаланыаҕыттан 6 сокуоннай сааһын туола илик оҕону үнтү көтүү түгэнэ бэлиэтэммит, онтон биирдэстэрэ оҕо бэйэтин буруйуттан, ол аата суолу анамматах сиринэн туораан иһэн тимир көлө анныгар киирэн биэрбит.

Суолга куттал суох буолуутун хааччыйар иниспиэктэрдэри кытары кыра оҕону иитиигэ-үөрэтиигэ устудьуоннар эмиэ үлэлэһэллэр. Автодорожнай факультет устудьуоннара идэлэрин толору баһылыыр туһуттан бу курдук өрүүтүн араас акцияларга, үөрэхтэргэ кыттыһаллар.

Василина Никонова, ХИФУ Автодорожнай факультетын 2 кууруһун устудьуона: "Инниктин баһылыахтаах идэбэр сөп түбэһэр. Ол иһин үөрэхпин бүтэрэн үлэ буларбар көмө буолуо".

 Онон хас биирдии суоппар бэйэлэрин холобурдарынан суолга сэрэхтээхтик, быраабыланы тутуһан сырыттахтарына, оҕолор суол быраабылатын дьэ өйдөөн, сэрэхтээхтик сылдьарга үөрэннэхтиринэ инникитин суолга-иискэ куттал суоһуура аччыыр чинчилээх