Булгунньахтаах оҕолоро 1958 сыллааҕы тутуу уһуйааҥҥа сылдьаллар

38

Булгунньахтаах нэһилиэгин “Сата” түөлбэтигэр уһуйаан икки дьиэнэн үлэлиир. Бастакы куорпус 1958 сыллаах тутуу, онтон иккис 1986 сыллаах. 

Тас өттүттэн көрдөххө оҕо тэрилтэтигэр марыннаабат олус эргэ дьиэҕэ 3 саастарыгар диэри оҕолор сылдьаллар. 70- ча сыл турбут мас тутуу, биллэн турар,  хайа да усулуобуйаҕа эппиэттээбэт. Бу уһуйааҥҥа билиҥҥи кырачааннар  төрөппүттэрэ, эбэлэрэ, эһэлэрэ сорох сорохторугар хос эбэлэрэ, хос эһэлэрэ сылдьыбыттар. Манна бириэмэ тохтообутун кэриэтэ - иҥнэри барбыт халыҥ кырааскалаах муоста, баата киэргэллээх мас араамалаах түннүк, чараас быыстар.

Ол эрэн төһө да усулуобуйа суоҕун үрдүнэн, кыһамньылаах уһуйааччылар кырачааннарга истиҥ сыһыаннара оҕо саас умнуллубат кэрэ түгэннэрин бэлэхтиирэ саарбаҕа суох.  Онтон  бэйэлэрин истэригэр "саҥа детсад" диэн ааттыыр аттынааҥы дьиэлэрэ эмиэ хаарбах туруктаах. Олоххо киирбитэ 40-ча сыл буолбут тутуу кээһэниитэ улахан. Сүрүн кыһалҕа - тымныы.

“Медикпыт суурадаһына муоста тымныы буолан дөйө тоҥон хаалар. Онон олус куһаҕан усулуобуйаҕа үлэлии олоробут”,- диэн  уһуйааччы көмөлөһөөччүтэ Диана Льова муус буолбут биэдэрэни көрдөрө-көрдөрө этэр.

Уһуйаан тымныытын сүрүн охсуута оҕолорго. наар үрэр, тымныы муостаҕа оонньуур кырачааннар сотору-сотору ыалдьаллар. Онон үксүн аҕыйах оҕо сылдьар.

"Уһуйааммыт эргэтэ төрөппүттэр бары кыһалҕабыт. Муостата олус тымныы буолан оҕолор ыалдьаллара элбэх. Саҥа дьиэ тутулларын олус күүтэбит",- диэн төрөппүттэр ааттарыттан Тамара Маркова санаатын үллэстэр.

Уһуйаан олус үрдүк сыбаайаҕа турар буолан муостатынан тымныйар. Онон иитиллээччилэр, уһуйааччылар  атахтарын олус халыҥнык таҥнар эрэ күүһүнэн сылдьаллар. Өссө тоҥуохтарын үлэһиттэр халыҥ баата суорҕанынан дьиэни эргиччи  хайан  тымныыттан быыһанналлар. Онтон иккис сүрүн кыһалҕа - уһуйаан дьиэтин кыараҕаһа.

"Дьиэбит кыраҕас. 23 оҕо сылдьар бөлөҕөр миэстэ тиийбэтиттэн дьарыктар икки сиринэн хайдан бараллар. Оонньуур сирдэригэр уонна утуйар хоско дьарыктары ыытарга күөэллэбит", - диэн уһуйааччы Татьяна Слепцова этэр.

Эргэ дьиэ күүскэ хамнаан, бөлөхтөр ааннарын баттаан олус ыараханнык арыллаллар. Аны иһэ сыбах буолан биир туспа кыһалҕа - сылы эргиччи саккырыы турар.

"Өһүөбүт олох саккырыы турар. Саас ириэрии кэмигэр тэстэр, ардахха олох да устабыт. Биэдэрэ, таас бүтүөр диэри тоһуйабыт", - диэн уһуйааччы көмөлөһөөччүтэ Мария Вионкурова эргэ уһуйаан кыһалҕатын үллэстэр.

Булгунньахтаахтар өр сылларга саҥа уһуйаан туруорсан кэллилэр, ол эрэн билигин да боппуруос аһаҕас. Ааспыт сылга улуус дьаһалтата бэйэтин харчытыгар тутан биэрэр тэрилтэни булбута. Сыбаайалар номнуо кэлэн сыталлар. Ол эрэн өрөспүүбүлүкэ өттүттэн сөбүлэҥ быһаарыллыыта уһаатар уһаан иһэр.

"Тутар тэрилтэ көстүбүтэ. Онтон билигин инвест бырагырааммаҕа киллэрии боппуруоһа турар. Ол кытаанах. Дьиҥэ быһаарыллара буоллар тутааччы үлэтин саҕалыа этэ", - этэ диэн балаһыанньаны нэһилиэк сэбиэтин депутаата Николай Назаров быһаарар.

Өрөспүүбүлүкэ  сөбүлэҥ биэрдэ эрэ  сотору кэминэн Булгунньахтаахха 2 мэндиэмэннээх 100 миэстэлээх таас уһуйаан дьэндэйиэҕэ.