"АгроХимБио" диэн олимпиада агро оскуолалар үөрэнээччилэригэр аан маҥнайгытын ыытылынна

Өрөспүүбүлүкэ үрдүнэн аан бастакытын "АгроХимБио" хайысханан ыытыллар олимпиадаҕа финалга киирбит оҕолор күрэстэһэллэр. Бу иннинэ бастакы түһүмэххэ 15 улуустан уопсайа 200 тахса үөрэнэччи бэйэтин билиитин тургутан көрбүтэ. Түмүккэ 6 улуустан 42 оҕо химия, биология предметтэригэр үрдүк көрдөрүүнү ситиһэн, кыайыылаахтары быһаарар күрэхтэһиигэ кытта сылдьаллар. Ол курдук манна Уус Майа, Чурапчы, Уус Алдан, Үөһээ Бүлүү, Горнай, Дьокуускай уонна Хаҥалас улууһун оскуолаларын үөрэнээччилэрэ кэлэн холбоһук сонун  хайысхаҕа билиилэрин көрдөрөллөр. Оҕолор туохха уустуктары көрсүбүттэрин бу курдук этэллэр.

Виктория Потапова, олимпиада кыттыылааҕа: "Гербарий түһүмэҕин саамай ыарырҕаттым. Үүнээйи көрүҥүн, кылааһын толору быһаарыы ирдэнэрэ".

Александр Леоненко, олимпиада кыттыылааҕа: "Балыгы хатырыганан сааһын ааҕыыны уустук дии санаатым".

Олимпиада сүрүн сыалынан оҕолор ортолоругар научнай-чинчийэр үлэҕэ интэриэһи тардыы, айар дьоҕурдарын сайыннарыы итиэннэ ону ситиһэргэ туһааннаах усулуобуйалары тэрийии буолар. Күрэхтэһиигэ 8 - 11 кылаас үөрэнээччилэрэ кытталлар. Холобура, бастакы түһүмэххэ үөрэнээччилэр оскуола бырагыраамматынан химия, биология уруоктарынан таҥыллыбыт  сорудахтары толорбут эбит буоллахтарына, түмүккэ оҕолор тус үөрүйэхтэрин, агро хайысханан  араас соруктары толорон көрдөрдүлэр. 

Пётр Дягилев, СӨ агрооскуолалар түмсүүлэрин толорооччу дириэктэрэ: "Олимпиада тэрээһинэ үрдүк таһымнаах. Үөрэнээччилэр уопут оҥороллоругар хааччыллыы толору".

Тэрээһин ЯАССР үтүөлээх учуутала Матрена Егоровна Васильева кэриэһигэр ыытыллынна. Матрена Егоровна өр сылларга Улахан Аан нэһилиэгэр биология, химия, география учууталынан, салгыы оскуола дириэктэринэн бэрт таһаарыылаахтык, ситиһиилээхтик үлэлээбитэ. Кини оҕо бары өттүнэн сайдыылаах буоларыгар усулуобуйа олохтонуохтааҕын оччолорго өйдөөн, үөрэнэргэ кабинеттар хааччыллыылаах буолалларын ситиспитэ. Кини үлэлирин саҕана олохтоох оскуолаҕа оҕо сынньалаҥын, үлэ лааҕырдара тэриллибиттэрэ. Матрена Егоровна улуус, өрөспүүбүлүкэ үөрэҕириитин сайдыытыгар, кэлэр көлүөнэ иитиитигэр дьоһун кылаатын киллэрбит киһинэн биллэр. Кини кэргэнинээн  Аркадий Алексеевичтыын  үс оҕону улаатыннаран дьоһун үлэһит гына ииппиттэрэ. Уоллара бэйэлэрин туйахтарын хатаран учуутал идэтин баһылаан, Улахан Аан оскуолатын уон сэттэ сыл устата салайан кэлбитэ.

Аркадий Пудов, Дьокуускайдааҕы 10№-дээх орто оскуола историяҕа учуутала, М.Е. Васильева уола: "Мин ийэм баар буоллар наһаа үөрүө этэ. Биһиги дьиэ киэн туттабыт маннык олимпиада ыытылларыттан. Олохтоох оскуола үөрэнээччилэрэ үрдүк көрдөрүүлээхтик кыттыахтара диэн эрэнэбит".

Олимпиада түмүгүнэн хас биирдии кылааһынан кыайыылаахтар ааттаннылар. Үрдүк көрдөрүүнү Улахан Аан, 2 Малдьаҕар орто оскуолатын үөрэнээчиилэрэ ситистилэр.