Суол инспекциятын үлэһиттэрэ суолга-иискэ араас аахсыйалары тэрийэллэр

Сыл саҕаланыаҕыттан Дьокуускайга  тахсыбыт 349 суол саахалыгар 43 киһи араас эчэйиини ылбыт, 2 киһи олохтон туораабыт. Маннык хомолтолоох статистиканы аччатар инниттэн, суол инспекциятын үлэһиттэрэ суолга-иискэ араас аахсыйалары ыыталлар. Бу күннэргэ  сатыы сылдьааччыларга анаммыт уонна тимир көлөҕө оҕону сөптөөхтук тиэйиини хонтуруоллуур тэрээһиннэр ыытылыннылар. Суоппардары тохтотон, оҕону тиэйии туһунан өйдөтөр сэрэтэр кэпсэтиини ыыттылар, суол быраабылатын төһө тутуһалларын бэрэбиэркэлээтилэр. Суол инспектэрдэригэр устудьуоннар күүс көмө буоллулар.

"Бу ый 9 күнүттэн Дьокуускай куораппыт үрдүнэн уонна тас сытар сэлиэнньэлэргэ рейдэ тэрээһиннэрэ саҕаланнылар. Ол эбэтэр гоставтоинспекция сүрүн өттүнэн, дьону уонна чуолаан оҕолору массыынаҕа сөптөөхтүк таһыыны көрүөхтэрэ. Ону кытта, суол быраабылатын атын пууннарын кэһиини көрүү буолуоҕа. Холобура, бэҕэһээҥҥи күнү ылан көрдөххө, рейдэ үлэтинэн 130 кэриҥэ суол быраабылатын кэспит суоппардарга административнай боротокуол толорулунна. Онтон биэһэ сокуоннай сааһын туола илик кыра оҕолору сыыһа таһыы буолар”, - диэн  Дьокуускай куораттааҕы суолга куттал суох буолуутун хааччыйар инспекция  пропагандаҕа инспиэктэрэ Владилена Охлопкова иһитиннэрдэ.

"Биһиги түөлбэбитигэр элбэх оскуола, оҕо уһуйаана баар. Уонна кыра оҕолор элбэхтэр. Ол иһин биһиги массыына ыытааччыларга сэрэхтээх буолун диэн рейдэ ыыттыбыт. Хаһыс да төгүлүн ыытабыт. Үөрэх дьылын иннинэ,  саас да буоллун уонна бу кыһын рейдэбитин ыыта турабыт", - диир 203 олорор түөлбэ старосталарын сэбиэтин бэрэссэдэээлэ Наталья Луковцева.

Санатан эттэххэ, массыынаҕа 7 сааһыгар диэри оҕону анал кириэһилэҕэ олордор ирдэнэр. Массыына кириэһилэтин оҕо ыйааһынын, үрдүгүн учуоттаан талыллыахтаах. 7-12 диэри саастаах оҕо маассыына кэлин олбоҕор булгуччу курга иилиллэр анал тэрилинэн туттарыллыахтаах. Оҕону массыынаҕа  сөптөөхтүк тиэйии, саахалтан харыстыырын умнуман диэн сэрэтэллэр.