"Тымныы оройо - Өймөкөөн" кыһыҥҥы экстремальнай марафон

Бу өрөбүллэргэ Өймөкөөн улууһугар  "Тымныы оройо - Өймөкөөн" кыһыҥҥы экстремальнай марафон 4-с төгүлүн ыытыллыаҕа. Быйылгы тэрээһиҥҥэ 108 экстремал спортсмен бэйэ кыаҕын холонуоҕа. Атлеттар уопсайа 4 дистанцияҕа сүүрүөхтэрэ. Марафон спортивнай тэрээһин курдук эрэ буолбакка, өссө научнай өрүттээх. Ол курдук, иккис сылын тоһуттар тымныыга сүүрэр дьон туругун чинчийии ыытыллар.

Руслан Шакин Аан дойдуну бүтүннүү эргийэ сүүрэр экстремал сүүрүүк. Кини 6 континены барытын эргийэр сыаллаах. Күн бүгүн, номнуо 17 дойдуну хабан сүүрдэ. Руслан Шакин Австралияҕа өҥүрүк куйааска сүүрэр хайдаҕын билбит буоллаҕына, билигин тоһуттар тымныыга Өймөкөөн оройуонугар бэйэ кыаҕын холонуоҕа. Кини бу соторутааҕыта, саамай тымныы диэн Забайкальскай кыраайга сүүрбүт, ол эрэн 45 кыраадыс тымныыга тургутууну ааһа иликпин диир.

"Тымныы оройо - Өймөкөөн" экстремальнай марафон быйыл 4-с төгүлүн ыытыллар. Күнү-дьылы кэтээн көрөөччүлэр сабаҕалааһыннарынан, марафон буолар күннэригэр, Өймөкөөн улууһугар 45-52 кыраадыс тымныы буолара күүтүллэр. Күрэхтэһии Өймөкөөн сэлиэнньэтигэр баар стеллаттан саҕаланыаҕа уонна Томторго түмүктэниэҕэ. Манна даҕатан эттэххэ, сыллата тэрээһин ыыра кэҥиир, кыттааччы ахсаана элбиир диэн тэрийээччилэр бэлиэтииллэр.

"Инникитин, биһиги марафоммут Россия таһымыгар биллэрин баҕарабыт. Уонна омук сириттэн кытта кэлиэхтэрэ диэн бигэ эрэллээхпит. Тоҕо диэтэр, бу иннинэ аҕыйах омук кэлэн кыттыыны ыла сылдьыбыттара. Бэйэлэрин эттэринэн-хааннарынан билбиттэрэ-көрбүттэрэ, тыыммыттара. Киһи этин-хаанын тургутан көрөр марафон буоллаҕа, ол иһин киһи бэйэтин кыаҕын боруобалатыан сөп", - диэн СӨ спортка уонна физическэй култуураҕа миниистирин солбуйааччы Гаврил Мохначевскай этэр.

Марафон Өймөкөөн улууһугар туризм хайысхатын сайыннарыыга эмиэ олук буолар. Тымныы оройугар сыллата, аан дойду араас муннугуттан, Саха сирин тыйыс тымныы салгынын эттэринэн-хааннарынан билиэн баҕалаах дьон кэлэн барар. Холобура, бу аҥардас экстремальнай усулуобуйаҕа сүүрүүгэ араас омук кытта кэлэр. Оттон олохтоохтор бэйэлэрин өттүлэриттэн ыалдьыттары үрдүк таһымнаахтык көрсөллөр.

"Олохтоохтор ыраахтан айаннаан тиийбит сүүһүнэн киһини көрсөллөр.  Сылаас дьиэлэригэр түһэрэн, аһатан, аны бу трасса 42 км, бу устатын тухары сылаас палааккалары туруоран, сылаас аһы, чэйи өрөн, нэһилиэнньэ улахан кылааты угар. Ортотунан, Өймөкөөҥҥө 1000 киһи кэлэн ааһар, быһаччы. Бу сир-дойду инниктин, туризм өттүгэр улахан сайдыылаах, кэскиллээх буолара сабаҕаланар.  Онно бу марафон кыра кылаатын киллэрэр", - диир "Тымныы оройо" туристическай индустрияҕа тэрилтэтин кыһыҥҥы экстремальнай марафону сайыннарыыга толорооччу дириэктэрэ Саргылаана Неустроева.

Марафон спорду, чөл олоҕу пропагандалааһын, туризм хайысхатын сайыннарарын таһынан, өссө научнай өрүттээх. Иккис сылын тустаах тэрээһиҥҥэ сүүрүүктэр эт-хаан өттүнэн туруктарын чинчийэллэр. Холобура,  саастарынан арааран, бу экстремальнай тымныыга сүүрэр туох үчүгэй өрүттээҕин, доруобуйаҕа туох туһалааҕын быһаараллар. Быйыл аан бастакытын , марафоҥҥа анаан оҥоһуллубут анал экипировканы икки сүүрүүк кэтэн, сүүрэн тургутан көрүөхтэрэ.