Чыамыйыкыга оттуур ходуһаларын оҥостоллор

Мэҥэ Хаҥалас улууһун Чыамыйыкы нэһилиэгэр тыа хаһаайыстыбатын сылын чэрчитинэн, оттуур ходуһаларын оҥостоллор. Тыа хаһаайыстыба  министиэристибэтин бырагыраамматынан, быйыл хас да сиргэ үлэ ыытыллыахтаах. Үлэни сүрүннээн, нэһилиэк тумус туттар тутаах киһитэ, Павел Дьячковскай иилээн ыытар.

Тыраахтарынан хас эмэ сыл үүнэн турбут дулҕалары анньаллар. Тыа хаһаайыстыбатыгар үйэтин тухары үлэлээбит Павел Афанасьевич, билигин төһө да ытык сынньаланыгар сырыттар, күн бүгүҥҥээҥҥи диэри тимир көлөтүгэр олорон, сир оҥоруутунан дьарыгырар. Өрөспүүбүлүкэҕэ үлэ сылын, улууска, нэһилиэккэ тыа хаһаайыстыбатын сылын чэрчитинэн, Чыамыйыкы биир бастыҥ, үлэһит туруу киһитэ саҥа сылы оттуур ходуһаны оҥоруутунан саҕалаата.

"Хотонум үлэтин быыһыгар, чугас буолан, кэлэн бульдозердыыбын. Дулҕа анньабын. Бу бульдозердыыр бытаан үлэ, саатар тыраахтарбыт кыра баҕайы, ол да буоллар кэлэн анньа турабыт", - диэн  тырахтарыыс  Павел Дьячковскай этэр.

Павел Афанасьевич боростуой үлэһиттэн, салайар үлэҕэ диэри үлэлээбит тыа хаһаайыстыбатыгар улахан өҥөлөөх киһи буолар. Биригэдьиирдээн бүтэн баран,  төрөөбүт нэһилиэгэр суол оҥоруутугар үлэлээбит. Онтон билигин ынах-сүөһүнү иитэрин таһынан ходуһаны оҥорор. Кини салҕыы бу курдук кэпсиир:

"Бастаан 1971 сылтан "Байкал" совхоз рабочайа этим, онтон 79-80 сылларга руководящие кадры техникумҥа үөрэммитим. Онтон ыла биригэдьииринэн үлэлээбитим".

Чыамайыкылар 2020 сыллаахтан тыа хаһаайыстыба министиэристибэтин бырагыраамматынан сирдэрин бырайыактаан, оҥотторон саҕалаабыттар. Сыл ахсын 10-20 гаа иэннээх сири чөлүгэр түһэрэллэр.

"Быйыл өссө биир бааһынай хаһаайыстыба, Романов Василий Евгеньевич   бырайыактаабыта. Бырайыак оҥостон, бу февраль ый бүтүүтүттэн, 10-ча га сири эмиэ астаран саҕалыахтаах. Министиэристибэ бырагыраамматынан иллэрээ сылтан үлэлиибит, бааһынай хаһаайыстыбалар бэйэлэрэ бырайыак оҥороллор. Сирдэрин выпискатын ылан, докумуоннарын барытын мунньан  сүүмэрдээһиҥҥэ кытталлар уонна маннык астараннар ороскуоттарын хас эрэ быраһыанын тыа хаһаайыстыбатын министиэристибэтэ уйунар", - диэн  Чыамыйыкы нэһилиэгин тыатын хаһаайыстыбатын исписэлииһэ  Егор Дьячковскай иһитиннэрдэ.

Тыраахтар аспыт сиригэр биир да дулҕа хаалбатах. Уопуттаах үлэһит сирин кыһаллан туран дэхсилиир. Кини бастаан дулҕаларын хорутар уонна ходуһаттан кытыыга диэри анньан таһаарар. Быйыл хаар халыҥ буолан, үлэ бытаарбыт.

Нэһилиэк үгүс олохтооҕо тыа хаһаайыстыбалаах. Күн бүгүн, бөһүөлэккэ 17 бааһынай хаһаайыстыба баар. Кыстыкка 590 хороҕор муостаах баар, ол иһигэр ына5а 230 төбө. Сылгыларын ахсаана 630.

"2020 сыллаахтан сири анньаллар. Ол курдук, биир улахан бааһынайбыт   Федоров Николай Петрович былырыын, иллэрээ сыл эмиэ сир оҥорон, ходуһа бөҕөтө оҥоһулунна. Павел Афанастевич Дьячковскай эмиэ атын бааһынай хаһаайыстыбалыыр сирдэрин анньар", - диэтэ Чыамыйыкы нэһилиэгин тыатын хаһаайыстыбатын исписэлииһэ  Егор Дьячковскай.

Бу курдук бөһүөлэктэн чугас сирдэри чөлүгэр түһэрэннэр, урукку оттуур ходуһаларын сөргүтэннэр, мантан сайын Чыамыйыкылар от былаанын толорор санаалаахтар.