Социальнай эргиэмсик реестрыгар киириигэ сайаапканы хомуйуу салҕанар

31

Бу хайысхаҕа анаан судаарыстыбаттан көмө көрүллэр буолбута быйыл 3 сыла. Грааны ылыы күрэҕэ  "Аччыгый уонна орто предприниматели өйөөһүн" диэн национальнай бырайыак чэрчитинэн ыытыллар.

"Салгын" киин сүрүн уратыта - үлэһиттэр бары харахтарынан мөлтөхтүк көрөр дьон. Биллэрин курдук,  доруобуйаларынан хааччахтаах дьон тарбахтара ордук сайдыбыт буолар. Онон кинилэр оҥорор массажтара хаһан баҕар сыаналанар. Иннокентий Никифоров эрдэ култуура эйгэтигэр үлэлии сылдьыбыт. Ол эрэн,  иһигэр наар массажист буолар баҕа санаалаах эбит. Ыра санаатын толорон,  билигин эти-сиини чэбидигирдиигэ ылсан үлэлиир.  

"Син биир киһи санаата туолуохтаах диэн санааттан үөрэммитим. Бу билигин,  номнуо диэххэ дуу, үлэбин саҕалаатым. Үлэ элбэх. Хас биирдии кэлбит киһи олоҕор сыаллаах, ол сыалыгар олорон хаалбакка эрэ тиийиэхтээх. Күннээҕи олох үөһүгэр киирэн, хамсана сылдьыахтаах буоллаҕа ди. Бу үлэлиир кииммит "Центр незрячего массажа" диэн. Бары харахтарынан моһуоктаах, олох көрбөт, эбэтэр мөлтөхтүк көрөр дьон үлэлии сылдьабыт", - диэн "Салгын" көрбөттөр массаажтыыр кииннэрин үлэһитэ Иннокентий Никифоров кэпсээтэ.

Бу киин социальнай урбааны сайыннарыы биир үтүө холобура. Манна доруобуйатынан хааччахтаах дьоҥҥо аҕыйаҕа суох үлэ миэстэтэ олохтонор. Итини сэргэ, кинилэр уопсастыбаҕа туһалара улаатар. Ааспыт сылга киин судаарыстыбаттан грант сүүйэн, кэҥэттибит дьиэтин өрөмүөнүгэр туһаммыт.

"Биһиги кииммитигэр 70 быраһыан доруобуйатынан хааччахтаах дьон үлэлиир. Ол курдук, бастакы уонна иккис гурууппалаахтар. Социальнай бизнеһи эрэ буолбакка, экологичнай биизнеһи эмиэ сайыннарабыт", - диэн "Салгын" көрбөттөр массаастыыр кииннэрин үлэһитэ Карина Петрова иһитиннэрдэ.

Социальнай урбаан реестрыгар кимнээх киириэхтэрин сөбүй. Манна киирэллэр үлэлэтэр дьоно 50 бырыһыантан тахсата инбэлииттээх буоллаҕына, эбэтэр бу араҥа дьоҥҥо өҥө оҥорор  буоллахтарына. Маны сэргэ, доруобуйатынан хааччахтаах киһи бэйэтэ тус дьыала арынан үлэлэтэр буоллаҕына хапсаллар. 

Көмө харчы куортамҥа, өрөмүөҥҥэ, эбэтэр оборудование ылыытыгар, коммунальнай өҥө иһин төлөбүрү толуйууга туһаныллыан сөп. Холобура, инники сылларга чааһынай уһуйаанар, кырдьаҕастарга уонна инбэлииттэргэ көрүүнэн-истиинэн дьарыктанар тэрилтэлэр граны ылбыттара. Итиэннэ Өлөөн улууһугар элбэх оҕолоох кыаммат ыаллары үлэ миэстэтинэн хааччыйар тыа хааһаайыстыбатын кооператива.

"Бу сыл үһүс кэрчигэр, субсидиялары грант быһыытынан түҥэтиэхпит. Онно туспа биллэрии тахсыаҕа. Көмө быһыытынан, Арктикаҕа үлэлии-хамсыы сылдьар социальнай урбаанньыттарга бу грант кээмэйэ 1 млн. солкуобайга диэри буолун сөп", -  диэн Атыы-эргиэн уонна туризм миниистирин солбуйааччы Максим Прокопьев сырдатта.

Сайаапкалары хомуйуу муус устар 30 күнүгэр диэри барыаҕа. Быйыл көрүллүбүт үп кээмэйэ улаатан, быһа холоон, 50 бэйэ дьыалалаах киһи граҥҥа хапсыаҕа