Дьокуускай куоракка үгэскэ кубулуйбут муустан, хаартан күрэх ыытыллар

49

Айылҕа матырыйаалыттан уран композицияны кыһан таһаарыыга 15 хамаанда сатабылын көрдөрөр. Маастардар бастаан муустан айымньылары туруоруохтара, онтон хаарынан ылсыахтара.

Нам улууһуттан сылдьар Василий Аргунов муус оҥоһуктары оҥорон саҕалаабыта, номнуо 20 кэриҥэ сыл буолбут. 2010 сыллаахтан араас күрэхтэргэ, бэстибээллэргэ кыттан саҕалаабыт. Бу да сырыыга кэлэн кытта сылдьар. Удьуор утума салҕанар диэбиттии, уолаттарын кытта араас күрэхтэргэ сылдьан, бэйэтин сатабылын, маастарыстыбатын тиэрдэр. Бу күрэххэ уолунаан Анатолийдыын кэлэн кытта сылдьар.

"Биһиги үлэбит Водоворот жизни диэн. Уу, эбэ хотун композициятын оҥоро сылдьабыт. Оҥоһуллан тьаҕыстаҕына уопсай хартыына буолуохтаах. Уолаттарым сылдьыспыттара 5-6 сыл буолла быһылаах. Маннык куонкурстарга сылдьаллар, кытталлар, миэстэлэһэллэр. Ол миэхэ күндү буоллаҕа ди", - диэн   күрэх кыттыылааҕа, Нам улууһун олохтооҕо Василий Аргунов кэпсээтэ.  

Дьокуускай куоракка хаар, муус оҥоһуктары оҥорор уустар бу курдук мустубуттара номнуо 12 сыла буолла. Манна Арассыыйа араас регионуттан,  итиэннэ Белоруссияттан кытта бааллар. Кинилэр бу күннэргэ киин куоракка мууһунан оҥоһуллубут паарка киэргэллэрин оҥороллор. Хас сыл ахсын күрэх бэйэтэ туспа анал тиэмэлээх буолар. Быйылгы сүрүн тиэмэлэринэн төрөөбүт дойдуну хоһуйуу, патриотическай тыыҥҥа үөрэтии буолар.

"Олунньу 6 күнүттэн саҕаламмыта. Бу 3 күҥҥэ муус, онтон икки аҥаар күҥҥэ хаарга. Мууска быйылгы тиэмэбит биһиэхэ Саха сирин айылҕата диэн буолар. Онно киирэллэр кыһыл кинигэҕэ киирбит кыылларбыт, ытык сирдэрбит. Хаарга патриотическай хабааннаах, ол эбэтэр урукку кэмнээх плакаттары хаарга дьүһүйэн таһаарыахтара", - диэн күрэх тэрийээччитэ Пётр Слепцов иһитиннэрдэ.

Кыттааччылар үлэлэрин дьүүллүүр сүбэ кэтээн көрөр. Күрэх түмүгүнэн,  бастыҥнары талыахтара. Ол курдук уопсайа 6 киһилээх хамыыһыйа сыаналыаҕа. Манна Арассыыйа худуоһунньуктарын союһун чилиэттэрэ, скульптордар, муус маастардара, муоһу кыһааччылар үлэлиэхтэрэ.

"Биэс критерийинэн сыаналыыбыт. Манна ылыныы, композицоннай быһаарыы, техника толоруута, уо.д.а баар буолуоҕа. Мууска үс бириистээх миэстэ уонна икки номинация аныыбыт, итиэннэ эбии бириистэр баар буолуохтара. Хаарга эмиэ маннык наҕараадаланыахтара", - диэн күрэхтэһии судьуйата Егор Степанов эттэ.

Маастар күрэххэ табыллан кыттыыта кини сатабылыттан, талааныттан эрэ тутулуктаах буолбатах. Манна сүрүн оруолу уһанар маллара эмиэ ылаллар. Ол иһин маастардар туттар тэриллэрин кичэллээхтик бэлэмнииллэр. Кинилэр муус оҥоһугу оҥоруунан эрэ муҥурдамматтар.

Хара сарсыардаттан киэһэ хараҥарыар диэри, маастардар оҥоһуктарын чочуйаллар. Кинилэр оҥорбут хаар хартыыналарын, дьүһүйүүлэрин, муус паарка арылыннаҕына көрүөххэ сөп буолар.