Тылларынан мөлтөх оҕолору үөрэтэр оскуола саҥа дьиэтэ арылынна

Дьокуускайга 20 сыл кэтэһиллибит  кыайан саҥарбат оҕолорго аналлаах Өрөспүүбүлүкэтээҕи оскуола улэҕэ киирдэ. Саҥа үөрэх кыһата 120 үөрэнэр миэстэлээх уонна 100 оҕону батарар интернат дьиэлээх буолла. Саҥа оскуола-интернат 1964 сыллаахтан тутуллан, үс сиринэн турбут мас дьиэни холбоото. Маны таһынан, манна автономнай саҥа хочуолунай, түөрт оонньуур уонна спортивнай былаһаакка баар.  Саҥа эбийиэк 5 тыһ. кв.м. курдук иэннээх. Билигин оскуолаҕа 192 оҕо Дьокуускайтан уонна 22 улуустан үөрэнэр.

"Бу оскуолабытыгар Өрөспүүбүлүкэ бары муннуктарыттан кэлэн үөрэнэллэр. Хомойуох иһин, тылынан мөлтөх оҕо сыл ахсын элбээн иһэр. Ол иһин биһиги оскуолабытыгар сыллата саҥа 45-50 оҕону ылабыт. Урукку дьиэлэрбит-уоттарбыт бары 50-с, 60-с сыллардаах эбит буоллахтарына, бу дьиэҕэ киирэн баран, биһиги дыбарыаска хаама сылдьар курдук сананабыт. Наһаа үчүгэй, ичигэс, сырдык, техническэй өттүнэн толору хааччыллыылаах, бары ирдэбилгэ эппиэттиир", -  диэн  Тылларынан мөлтөх оҕолору үөрэтэр өрөспүүбүлүкэтээҕи оскуола дириэктэрин үөрэх чааһыгар солбуйааччы Светлана Захарова кэпсээтэ.

Доруобуйаларыгар хааччахтаах оҕолорго бары усулуобуйа олохтонно. Толору үөрэҕи ыларга оскуола аныгы тэрилинэн туолла. Үөрэнэр кылаастары таһынан, сынньанар, оҕолор үөрэхтэригэр бэлэмнэнэр, эбии үөрэх ылар хостор уонна аактабай саалалар бааллар. Маны таһынан, эмчиттэр кэбиниэттэрэ эмиэ оҥоһулунна, кэлээскэнэн сылдьар оҕолорго пандус, лифт туруорулунна