Мас тардыһыыга Саха сирин Чемпионата элбэх күүстээх мадьыныны муста

Икки күн устата тыҥааһыннаах киирсиилэр түмүктэринэн дьахталлар, эр дьон уонна бэтэрээннэр ортолоругар ыйааһыннарынан бастыҥнар ааттаннылар. Оттон саамай элбэх кыайыылаах Мэҥэ-Хаҥалас хамаандата, номнуо хаһыс да сылын тэҥнээхтэрин булбата.

Мас тардыһыытыгар быйылгы чемпионат саамай күүтүүлээх уонна өрө күүрүүлээх буолла. Өрөспүүбүлүкэ саамай күүстээх, баай уопуттаах уонна эдэркээн кэскиллээх мадьынылара биир сиргэ түмсэн сүрдээх тыҥааһыннаах киирсиилэри көрдөрдүлэр. Сыл ахсын саха норуотун төрүт, сөбүлүүр көрүҥүнэн дьарыктаныан баҕалаах ахсаана элбээн, таһымнара, маастарыстыбалара үрдээн иһэр. Бу сырыыга күрэхтэһиигэ ааспыт сылтан бүтүн сүүсчэкэ киһинэн элбэх спортсмен илин-кэлин түһүстэ. 

"Быйыл Аан дойду чемпионата буолар. Онон спортсмен ахсаана элбээтэ.  Былырыын 289 буоллаҕына, быйыл 371 спортсмен кытта сылдьар", - диэн  күрэхтэһии кылаабынай судьуйата  Егор Ермолаев иһитиннэрдэ.

Икки күн устата ыйааһыннарынан арахсан, ааттаах-суоллаах мадьынылар, Россия спордун маастардара кыайыыга дьулуурдарын көрдөрдүлэр. Сорох ыйааһыннарга бастакы күн түмүгүнэн лидердэр уларыйан, саҥа ааттар таҕыстылар. Ол эрээри, ааспыт сыллааҕы Чемпионнар, титулларын туран биэрбэтилэр. Холобура, киэҥ сураҕырбыт Дмитрий Попов 105 ыйааһыҥҥа эрэллээхтик бастаан, бүтүн маска 10 төгүллээх Чемпион үрдүк аатын сүктэ.  Оттон 90 киилэҕэ спорт национальнай көрүҥнэригэр бэтэрээнэ, Дыгын ооньууларын кыайыылааҕа  Алексей Кутуков утарсааччытын Семен Атаковы кыайан, номнуо үһүс төгүлун кыһыл көмүс мэтээли ситистэ. Бу ыйааһыҥҥа аан дойду түөрт төгүллээх чемпиона Павел Черноградскай кыттыбатаҕынан, элбэх уол күүһүн-кыаҕын холонно. Кинилэр ортолоругар Бүлүү уолана, устудьуон Мичил Семенов эмиэ бэйэтин тургутан көрдө. 

Өрөспүүбүлүкэҕэ мас тардыһар кэрэ аҥардарынан кими даҕаны соһуппаккын. Дьахталлар ортолоругар 7 ыйааһыҥҥа күүстээх спортсменнар кытыннылар. Наталья Черноградская, Анастасия Алексеева , Норайаана Трофимова, Ирина Севрюк, Татьяна Баишева эрэлээхтик кыайыыны ситистилэр. Сардаана Осипова бу сырыыга боруонса мэтээли ылла. Нам улууһуттан сылдьар Алина Бурнашева оҕо сылдьан ситиһиилээхтик маска кыттар этэ, онтон хас да сыллаах сынньалаҥ кэннэ, эрчиллиилэрин сөргүтэн улахан дьоҥҥо киирсэр. Алина 65 киилэ ыйааһыҥҥа кытта сылдьар, бу категорияҕа бүтүн 5 Россия спордун маастара баар, онон миэстэлэһэр ыарахан буолара күүтүллэр.  

Бэтэрээннэр ортолоругар күрэхтэһии эмиэ бэрт тыҥааһыннаах буолла. 4 ыйааһыҥҥа баай уопуттаах мадьынылар күрэс былдьастылар. Хаҥалас улууһуттан сылдьар Андреян Харитонов 90 сыллартан маһынан үлүһүйэн дьарыктанар. Сүүрбэччэ сыл бэтэрээннэргэ киирсэн кэллэ. Бу Чемпионакка Андреян 75 киилэҕэ кытынна. Биир киирсиитигэр кини бэйэтиттэн 18 сыл баслыс уолу хотто. Түмүккэ Андреян иккис миэстэни  ситиһэн үөрүүтэ үксээтэ.

Күрэхтэһиигэ кыайбыттар Россия Чемпионатыгар барар кыахтаныахтара. Хамаанданан Мэҥэ Хаҥаластар бастаатылар, иккискэ Уус Алданнар таҕыстылар, үһүс миэстэни Хаҥалас мадьынылара ыллылар