"Юнармия" Саха сиринээҕи салаата олунньу ыйы өрөспүүбүлүкэҕэ Патриотическай иитии ыйынан биллэрдэ

Оҕону дойдуга бэриниилээх буолууга иитии боппуруоһа билиҥҥи кэмҥэ сытыытык турар. Ол курдук "Юнармия" Саха сиринээҕи салаата олунньу ыйы өрөспүүбүлүкэҕэ Патриотическай иитии ыйынан биллэрдэ. Тэрээһин үөрүүлээх арыллыытыгар Дьокуускайдааҕы кадеттар оскуолаларыттан уонна киин куорат "Юнармия" хамсааһынын иитииллээчилэрэ уопсайа 80 киһи кэлэн кыттыыны ыллылар. Араас наҕараадалары туттулар.

Максим Назаров, Дьокуускайдааҕы кадетскай оскуола 11 кылааһын үөрэнээччитэ: "Бу тэрээһин кэмигэр биһиги юнармеецтар 3 истиэпэннээх мэтээллэрин ыллыбыт".

Өрөспүүбүлүкэ бары улуустарыгар 7660 "Юнармия" иитиллээччилэрэ бааллар. Кинилэргэ анаан биир ый устата араас хабааннаах тэрээһиннэр ыытыллыахтара. Ол курдук маастар кылаастар, байыаннай дьыалаҕа сыһыаннаах уруоктар буолуохтуора, түмүктүүр тэрээһининэн олунньу ый бүтүүтэ эдэр байыастар отчуоттуур кэнсиэрдэрин көрдөрүөхтэрэ.

Александр Кузьмин, "Юнармия" саха сиринээҕи салаатын салайааччыта: "Сыл аайы олунньу ый үөрэх тэрилтэлэригэр ийэ дойдуга бэриниилээх буолуу ыйынан биллэриллэр. Онно оскуола оҕолоро, уһуйааннар, эбии үөрэхтээһин тэрилтэлэрэ уонна орто анал үөрэх кыһалара бу ый чэрчитинэн араас тэрээһиннэргэ кытталлар".

Тэрээһин үөрүүлээх арыллыытын кэнниттэн оҕолор кабинеттарынан арахсан араас маастар кылаастарга сырыттылар, үҥкүүгэ, байыаннай  хаамыыга уонна саанан ытыыга билиилэрин, сатабылларын тургутан көрдүлэр. Манна устудьуоннар кэлэн эмиэ көхтөөх кыттыыны ыллылар.

"Ыччаттарбыт ийэ дойдуларыгар бэриниилээх дьон буола улаатыахтара диэн эрэнэбит. Бүгүҥҥү тэрээһиҥҥэ мустубут оҕолору көрөн дойдубут инники кэскиллээх эбит", -  дии санаатым диэн ХИФУ байыаннай үөрэҕин киинин салайааччыта Геннадий Сысоев санаатын эттэ.

Оскуола оҕолоро, юнармия иитиллээччилэрэ уонна кадетскай оскуола үөрэнээччилэрэ бары бииргэ алтыһан араас тэрээһиннэри ыытыахтара уонна кинилэргэ анаммыт анал семинардар буолуохтара. Саха сиригэр баар араас  күүс тэрилтэлэрин  үлэлэрин хамнастарын кытары билсиэхтэрэ.

Бу маннык тэрээһин хас сыл ахсын ыытыллар уонна биир ый устата тохтобула суох барар, онон мантан ыла өрөспүүбүлүкэ бары оҕолоро "Юнармия" хамсааһынын кытары билсэн, дойдуга бэриниилээх буолууга дьулуһуохтара.