Суоттулар саҥа култуура дьиэтин туруорсаллар

Тыа сиригэр култуура киинэ дьону түмэр. Уус Алдан улууһун Суотту нэһилиэгин "Мичээр" сынньалаҥ киинэ 1960 сыллаахха тутуллубут дьиэҕэ күн бүгүҥҥэ диэри үлэлии олорор.

Мааны таҥастаах "Далбардар" киирэннэр, култуура киинин сыаната сэргэхсийэ түһэр. Оттон бу нэһилиэк кэрэ аҥардарын түмсүүтэ  нэһилиэккэ эрэ буолбакка бүтүн улуус олоҕор оруолу оонньуур. Саха АССР төрүттэммитэ 100 сылыгар туһуланан тигиллибит сахалыы соннору "Далбардар" барытын бэйэлэрэ тикпиттэр.

Клавдия Алексеева, Суотту нэһилиэгин олохтооҕо: "Евдокия Иванова көҕүлээһининэн сахалыы сон тигиннибит. Соммут олох былыргылыы киэптээх оноолоох "

Чахчы, өбүгэ саҕаттан кэлбит халыыбынан тигиллибит сону киһи сөҕө-махтайа эрэ көрөр. "Далбардар" илиинэн ииһи баһылаабыт эбит буоллахтарына,билигин аны сиэлинэн хатыы кистэлэҥин арыйаллар. Кинилэргэ түмсүүлэрин биир тутаах хотуна, уран тарбахтаах Прасковья Бочкарева көмө буолар. Прасковья Владимировнаны 2012 сыллаахха бу көрүҥ дьарыкка кэргэнэ сыһыарар. Ол кэмтэн ыла маастар дьоҕура өссө арыллан,аны кини билигин кыргыттарын үөрэтэр.

Прасковья Бочкарёва, Суотту нэһилиэгин олохтооҕо: "Бастаан суоппардарга оҥорон саҕалаабытым. Онтон сэлээппэҕэ ылсыбытым. Билигин дьону үөрэтэбин, маастар-кылаастары биэрэбин. Дьөһөгөй оҕотун кылын төһө туттабыт да соччонон харысхаллаах курдук сананабыт".

Бу курдук Суоттутааҕы "Мичээр" сынньалаҥ киинигэр 21 түмсүүттэн биирдэстэрэ   "Далбардар" буолаллар. Култуура киинин историятын сэгэтэн аастахха, кулууп дьиэтэ 1960 сыллаахха тутуллан үлэҕэ киирибитэ. Сынньалаҥ киинин иһинэн Василий Свинобоев аатын сүгэр Суоттутааҕы норуодунай тыйаатыр күн бүгүн өрө көтөҕүүлээхтик үлэлии сылдьар. Репертуара тыа сирин кэмээйинэн улахан. "Күн күөрэйиэн иннинэ","Кэрэ кемүскэлигэр", "Төлөлөөх түөнэ маҥан түөрэх" онтон да атын улуу суруйааччыларбыт айымньыларынан туруоруулары дьон биһирэбилин ылбыттара

Наталья Степанова, Суоттутааҕы "Мичээр" сынньалаҥ киинин В.Свинобоев аатынан норуодунай тыйаатырын режиссёра: "Тыйаатыр норуодунай ааты түөрт сыл буола буола көмүскүүр. Быйыл олунньуга бу көмүскүөхтээхпит. Онно репертуарбыт Реас Кулаковскай “Бойуот” диэн айымньытынан драма туруора сылдьабыт".

Сынньалаҥ киинэ олох ирдэбилинэн тэҥҥэ хааман, ааспыт сылга улахан граҥҥа тиксибит. Бу чэрчитинэн Суотту олохтоохторо улахан экраҥҥа буруолуу сылдьар саҥа киинэлэри көрөллөр.

Валентина Протасова, Суоттутааҕы "Мичээр" сынньалаҥ киинин салайааччыта: "Былырыын “Малые залы” диэн бырайыак көмүскээммит 1 мөлүйүөн солкуобай сууммалаах грант сүүйэн турабыт. Инньэ гынан тыа сиригэр куораттан итэҕэһэ суох сахалыы киинэлэр премьераларын көрлөрө олоробут".

Бу курдук ньиргиччи үлэлии турар "Мичээр" сынньалаҥ киинэ 1960 сылга тутуллубут эбийиэккэ күн бүгүҥүгэр диэри үлэлии турар, биллэн турар, мас дьиэ хаарбах туруктаммыт. Онон Суоттулар саҥа култуура киинин дьиэтин тутуллуутун туруорсаллар