Халлаан туруга эмискэ уларыйан, балыыһаҕа көрдөрүнээччи ахсаана элбээтэ

Быйыл Саха сиригэр өтөрүнэн буолбатах уһун тымныы күннэр сатыылаатылар. Оттон саҥа ый  үүнээтин кытта тымныы уҕарыйан, дьон-сэргэ дьэ "һуу" диэн сүргэтэ көтөҕүлүннэ. Бу сылыйыы сүрүн төрүөтэ - сис былыт кэлиитэ буолла. Быйылгы сылга бастакы циклон Камчаткаттан тахсан хотугу муора кытылынан устан иһэн биһиги өрөспүүбүлүкэбитигэр үктэннэ. Онон үгүс улуустарга биллэ сылыйан, хаар түһэр.

Саргылаана Никитина, Дьокуускайдааҕы гидрометеорологическай сулууспатын күнү-дьылы кэтээн көрөр салаатын салайааччыта: "Олунньу 3 күнүттэн бу циклон күүһэ мөлтөөн хотугулуу-арҕааттан соҕуруулуу – арҕаа ааһыаҕа. Онон арҕаа уонна соҕуруулуу-арҕаа хаардаах тибиилээх буолоуҕа. Салгын температурата түүнүн -35-40, онтон соҕуруулуу – арҕаа -20-25 кыраадыс буолуоҕа". 

Илин эҥэр уонна хотугулуу-илин улуустарга салгын температурата син биир тымныы, түүнүн - 53 диэри, күнүһүн -46-48 диэри тымныы турар. Оттон киин куоракка бу күннэргэ  кыра хаардаах күн-дьыл туруо диэн синоптиктар этэллэр, күнүһүн -32-34 кыраадыс турара сабаҕаланар. Маннык халлаан эмискэ уларыйыыта дьон доруобуйатыгар охсуулаах.  Дьокуускайдааҕы үһүс нүөмэрдээх балыыһаҕа терпаевт быраастарга ортотунан күҥҥэ 30 киһи кэлэн көрдөрүнэр. 

Серафим Слепцов, Дьокуускайдааҕы 3№-дээх балыыһа терапевт бырааһа: "Дьон ордук хаан батааһына кэһиллэн, сүһүөхтэрэ ыалдьан көрдөрүнэ кэлэллэр. Хроническай ыарыылар бу маннык кэмҥэ көбөллөр".

Ону тэҥэ оҕолор ортолоругар орви, грипп ыарыыта элбэх даҕаны көрдөрүү алын кирбиини куоһарбат. Ол эрээри сотору кэминэн сыл ахсын буоларын курдук сезоннай тумуу ыарыыта олунньу, кулун тутар ыйдарга үрдүүрэ күүтүллэр.    

Валентина Григорьева, Роспотребнадзор СӨ салалтатын эпидемиологическай кэтээн көрүү салаатын салайааччытын солбуйааччы: "Кэтээн көрүү түмүгүнэн ОРВИ-ны уонна гирииби тарҕатар араас вирустар бааллара биллэр. Ол курдук парагрипп, аденовирус, риновирустар. Манан сибээстээн олунньуга уонна кулун тутарга ыарыы таһыма үрдүө диэн сэрэтэбит".

Бу күннэргэ кэлбит сылыйыы өр турбат, номнуо бээтинсэттэн саҕалаан тымныылар төннүөхтэрэ диэн күнү-дьылы кэтээн көрөөччүлэр билгэлииллэр. Одун Хаан ыйа - олунньу тымныы буолара сабаҕаланар. Ол да буоллар бу ыйга тымныы оҕуһун кута-сүрэ тостор, күн биллэ уһуур, саас чугаһыыр.