Инбэлииттэри чөлүгэр түһэрэр киин байыаннай дьайыы кыттыылаахтарын эмтээһиҥҥэ ылар

Өрөспүүбүлүкэтээҕи инбэлииттэри чөлүгэр түһэрэр кииҥҥэ доруобуйаларынан хааччахтаах дьон киирэн эмтэниини ылаллар. Манна кинилэргэ анаан араас медицинскэй, психологическай көмөлөрү оҥороллор. Сүрүн болҕомто эти-хааны чэбдигирдиигэ ууруллар. Ол курдук манна эмтиир физкультура нөҥүө араас эрчийэр тэриллэргэ дьарыктаналлар. 80 саастаах Анна Дмитириевна бу кииҥҥэ бастакы киириитэ буолар, онон араас таһымнаах эрчиллиилэри ылан үөрүүтэ үгүс.

Анна Осипова, Дьокуускай куорат олохтооҕо: "Харым тостон 3 ыйы мэлдьи тарбаҕым  токуруйбат этэ, ону манна наһаа үчүгэйдик эмтииллэр.  Холобур, бу аппараакка олоробун, ону тэҥинэн массаж оҥороллор".

Бүтэһик сылларга реабилитациялыыр киин үлэтин хайысхата кэҥээн, саҥа оборудованиелары атыылаһан, доруобуйаны чөлүгэр түһэриинэн эрэ буолбакка,  араас медицинскэй көмөнү эмиэ оҥороллор, ыарыы арааһын эмтииллэр. Маргарита Иванова бу кииҥҥэ 5 сыллааҕыта эмтэнэ сылдьыбыт, бу күннэргэ эмиэ саҥаттан  киирбит.

Маргарита Иванова, Хаҥалас улууһун олохтооҕо: "2017 сыллаахха сылдьыбытым, онтон ыла өссө сайдыбыттар.  Эрдэ  аҥардастыы реабилитация буолаҕына билигин эмтииллэр эбит, ыалдьар буоллаххына эмп арааһын биэрэллэр, оннооҕор систиэмэ туруорар буолбуттар".

Бу манна байыаннай дьайыы кыттыылаахтара эмиэ чөлүгэр туһэрииини ааһаллар. Билиҥҥи туругунан 40 анал байыаннай дьайыы кыттыылаахтара кэлэн эмтэнэн, доруобуйаларын бөҕөргөтөн аастылар. Өссө даҕаны кинилэргэ көмө салҕанар.

Асида Алексеева, өрөспүүбүлүкэтээҕи  инбэлииттэри чөлүгэр түһэрэр киин дириэктэрэ: "Билиҥҥи туругунан икки уол баар. Аан бастаан болҕомтобутун психолог ыытар көмөлөрүгэр уурабыт.  Ону таһынан  медицинскэй реабилитацияны ыытабыт - массаж, ЛФК, физиотерапия, эрготерапия".

Аан бастаан кэлбит киһи доруобайытын туругун чинчийэн көрөллөр, психологы кытары кэпсэтиини ыыталлар, ол кэннэ эмтэнии былаана оноһуллар, араас процедуралы аныыллар. Эрчийии уонна эмтээһин быраас хонтуруолунан ааһар. 

Бу кииҥҥэ саха сирин үлэҕэ министиэристибэтин көҕүлээһининэн байыаннай дьайыы кыттыылаахтарын эрэ буолбакка бүтүн дьиэ кэргэни реабилитациялыырга анал бырагыраамма үлэлиэҕэ. Манна кинилэр босхо кэлэн доруобуйаларын туругун көрдөрүнэр, психологы кытары кэпсэтэр кытары үлэлэһэр кыахтаныахтара. Өскөтүн маннык көмө боппуруоһа сытыытык турдаҕына Нерюнгрига, Аммаҕа, Ньурбаҕа уонна Өлүөхүмэҕэ эмиэ киириэн сөп