Бүөр ыарыылаахтар ахсааннара элбиир

28

Саха сиригэр бүөр ыарыытын көрдөрүүтэ үрдүк. Кэнники сылларга саастаах эрэ дьон буолбакка, эдэр дьон ортотугар бүөр араас ыарыыта киэҥник тарҕанна. Дьокуускайга нефрология уонна диализ киинэ аһыллыбыта иккис сылыгар барда. Манна ким баҕалаах кэлэн бүөрүн туругун көрдөрөн, толору чинчийиини ааһар кыахтаах.

Нефрология уонна диализ киинэ аныгы кэм ирдэбилинэн икки сыллааҕыта аанын тэлэччи аспыта. Саха сиригэр нэһилиэнньэ ортотугар бүөр ыарыыта биир үрдүк көрдөрүүлээҕинэн биллэн, бүгүҥҥү күҥҥэ бэрт сытыытык турар кыһалҕа. Чуолаан гемодиализка наадыйар ыарыһах ахсаана 600-чэкэ кэриҥэ, оттон диализ миэстэтэ олох аҕыйах. Ол курдук, республикаҕа диализ кииннэрэ Дьокуускай таһынан, Жатайга, Мирнэйгэ уонна Нерюнгрига эрэ бааллар. Онон бу киин аһыллыбыта тустаах ыарыһахтарга улахан көмө буолар.

Марфа Бурцева, нефрология уонна диализ Киинин кылаабынай бырааһа: "Биһиги кииммит диализнай салаата 300 тахса киһини хабар кыахтаах. Маны таһынан дьиэҕэ диализтааһын диэни оҥоробут. Манна 25 киһилээхпит".

Дьиэ диалиһа диэн стационарга сытан аппараат гемодиалиһын солбуйар процедура, ол эбэтэр киһи бэйэтэ дьиэ усулуобуйатыгар хаанын ыраастыыр кыахтаах. Биллэн турар, ыарыһах бырааһын кытары толору сибээскэ сылдьар, онон бары өттүнэн эрэллээх буолар. Ольга Дмитриевна Горохова ыраах Дьааҥы улууһун Баатаҕай бөһүөлэгиттэн кэлэ сылдьар. Ааспыт сыл сааһыттан дьиэ диалиһыгар олорор, манна кэлэн доруобуйатын туругун бэрэбиэркэлэнэр.  

Ольга Горохова, Дьааҥы улууһун олохтооҕо: "Ыраах Дьааҥыга олорор буоламмын миэхэ дьиэ диалиһа ордук барсар. Ол иһин бу ньыманы талбытым".

Нефрология уонна диализ киинигэр полиһынан ким баҕарар кэлэн босхо көрдөрүнэр кыахтаах. Нефролог быраас көрөн хаан, иик аналиһыгар ыытан, бүөрүгэр туох кэһиллии баарын, уопсай туругун быһааран эбии чинчийиилэри ыытан ыарыын эрдэттэн булуон сөп. Онон исписэлиистэр сылга биирдэ хайаан даҕаны бүөрү көрдөрөргө сүбэлииллэр. 

Ксения Давыдова, нефрология уонна диализ киинин кылаабынай бырааһын эмтиир үлэҕэ солбуйааччы: "Хаан баттааһына кэһиллиилээх уонна диабеттаах дьон бүөрдэрэ мөлтөх буолар. Уопсайынан бүөр биллэрбэккэ ыалдьар. Ол иһин туһааннаах бэрэбиэркэ эрэ кэмигэр биллэр".

Нефрология уонна диализ киинин быраастара улуустарга тахсан дьону эмиэ көрөллөр-истэллэр. Сотору кэминэн Ньурба улууһугар киин бэйэтин филиалын аһар соруктаах, оччотугар Бүлүү бөлөх улуустарын олохтоохторо миэстэтигэр туһааннах көмөнү ылар кыахтаныахтара.