Уус Алданнааҕы техникумҥа саҥа дефектоскопист диэн үөрэх арылынна

Уһуйааччы Семен Артемьев устудьуоннар баһылыахтаах идэлэрин ымпыгын-чымпыгын быһаарар. Быйылгыттан Уус Алданнааҕы техникумҥа саҥа дефектоскопист диэн үөрэх арылынна. Сэдэх идэни билигин өрөспүүбүлүкэҕэ манна эрэ үөрэтэллэр. Онтон бу идэ күннээҕи олоххо, күөх төлөн, ититии, олох-дьаһах коммуннальнай эйгэтигэр үлэлиир дьоҥҥо олус наадалаах, туһалаах. Сыбаарка хаачыстыбатын быһаарар соруктаах.   

Семён Артемьев, Уус-Алданнааҕы техникум производственнай үөрэхтээһиҥҥэ маастара: "Бу идэҕэ 10 ый үөрэтэбит. Онтон дефектоскопист диэн идэни баһылыыллар".

Дефектоскопист идэтин боростуой тылынан быһаардахха маннык -  холобура, билигин сыбаарка сиигэ ханан тэстибитин быһаарарга хас эмэ миэтэрэ сири хаһан билэллэр. Онтон бу идэни баһылаабыттар таһыттан анал тэрилинэн эбэтэр ультразвук көмөтүнэн быһааран үлэ хаамыытын чэпчэтэллэр.  

Андрей Стрекаловский, Уус-Алданнааҕы техникум дириэктэрэ: "Икки идэҕэ үөрэтэр мастарыскыайы Национальнай бырайыак гранын кыайаммыт тэрийдибит".

Күн бүгүн техникумҥа өрөспүүбүлүкэ араас муннугуттан 200 бүддьүөт уонна 25 төлөбүрдээх үөрэххэ оҕолор 8 белеҕүнэн хайдан үөрэнэллэр. Манна биир бас-көс миэстэни сварщиктар идэлэрин баһылыыр үөрэх ылар.

Николай Ноговицын, Уус-Алданнааҕы техникум производственнай үөрэхтээһиҥҥэ маастара: "Быйылгы сылга 25 оҕолоохпут, маны сэргэ оскуола оҕолоро профориентация диэҥҥэ кэлэн бараллар".

Бу курдук Уус Алданнааҕы техникум инниккигэ сыалланан, сыллата үөрэтии таһымын үрдэтэргэ соруктанан үлэлиир. Үөрэх кыһатын бүтэрбит выпускниктар үксүн тутууга, баһаарынай чаастарга, массыына өрөмүөннүүр мастарыскыайдарга, олох-дьаһах коммунальнай уонна общественнай ас-үөл эйгэтигэр үлэҕэ киирэллэр. Хамнастарын тэрилтэ тарыыбынан 40 - 120 тыһ. солкуобайга диэри илиилэригэр ылаллар.