Социальнай хантыраак бэрээдэгэр үүммүт сылга уларыйыылар бааллар

32

2030 сылга диэри дойду үрдүнэн дьадаҥы ыал ахсаанын 2 төгүл аҕыйатыы - дойду сүрүн соруктарыттан биирдэстэрэ. Көмө харчыны биэрии аадырыстаммыт хайысхаларга арахсан, эбии саҥа бырагырааммалар киирдилэр.

Бэйэтэ учуутал идэлээх Ньургуйаана Мун өссө уонча сыллааҕыта логопед үөрэҕин баһылаабыта. Билигин кини бэйэтэ оҕо тылын сайыннарар киин аһан үлэлэтэр. Бэйэ дьыалатын Ньургуйаана Николаевна социальнай хантыраак көмөтүнэн аһар кыахтаммыта. Билэр дьонуттан маннык өҥө баарын истэн, тута социальнай харалта салалтатыгар сайаапка биэрэн, ирдэбилгэ эппиэттиир буолан, көмө харчы ылан, өр сылларга туруорбут сыалын ситиһэн киин арынна. Аныгы үйэҕэ хойутаан тылланар, биитэр саҥаралларыгар кэһиилээх оҕо элбэҕинэн, кинилэргэ көмөлөһөр сыалтан, туспа ньыма киллэрэн оҕолору дьарыктыыр. Логопед, оҕо саҥатын сайыннарар киин салайааччыта Ньургуйаана Мун үлэҕэ хайдах ылсыбытын туһунан иһитиннэрдэ:

"Кулун тутар ыйтан төрөппүттэргэ онлайн курстары оҥорбутум. Төрөппүттэр эрчиллиилэринэн оҕолорун дьарыктааннар, үчүгэй көрдөрүү баар этэ. Онтон хас да төрөппүт бэйэн дьарыктаабаккын дуо диэн этии киллэрбиттэрэ. Ону балаҕан ыйыгар боруобалаан көрбүтүм. Үчүгэй көрдөрүү баар буолуо дуо, бизнес быһыытынан барыан сөп дуо диэн боруобалаабытым".

Ньуругуйаана Николаевна бэйэтэ тустаах көдьүүстээх бырагыраамма таҥан, оҕоҕо дьиҥ чахчы туһалаах буоларын бигэргэппитэ. Онтон билигин туспа киэҥ-куоҥ кабинет арендалаан, наадалаах малларынан хааччыйан үлэлии-хамныы сылдьар. Ааспыт 2022 сылга Дьокуускай үрдүнэн социальнай хантыраак нөҥүө бэйэ дьыалытын 206 ыал аһар кыахтаммыта. Бэйэ кэтэх хаһаайыстыбатын 17 дьиэ кэргэн тэриммитэ, үлэ көрдөнөрүгэр уонна ыарахан балаһыанньаҕа түбэспиттэргэ эмиэ харчынан көмө оҥоһуллубута. Барыта биир тыһыынчаттан тахса ыал социальнай хантыраак түһэрсэн хабыллыбыта.  Быйылгы сылга бу хайысхаҕа улахан уларыйыылар киирдилэр. Сүрүн төрүөт - кыра дохуоттаах ыалларга биир кэлим босуобуйа олохтонон социальнай фондаҕа көспүтэ буолла.

"100 быраһыаннаах биир кэлим босуобуйаны ылар дьиэ кэргэн, 2023 сылга биһиги салалтабытыгар саҥа анал бырагырааммаҕа сайабылыанньа биэриэн сөп. Бу бырагыраамма оҕону сайыннарыыга аналлаах. Ол аата, дьиэ кэргэн оҕону спортивнай, эбэтэр сайыннарар куруһуоктарга суруттарыан сөп. Эбэтэр спортивнай инвентарь, музыкальнай инструмент ыларга", - диэн Дьокуускай куорат нэһилиэнньэтин социальнай харалтаҕа салалтатын начальнига Семён Матвеев сырдатта.

Бу көмө кээмэйэ - тиийинэн олоруу ыйдааҕы кээмэйин аҥара, оҕо ахсаанынан биирдэ бэриллэр. Өссө биир тустаах саҥа бырагыраамманан, доруобуйаларынан хааччахтаах дьоҥҥо көмө буолар. Кинилэр социальнай хантыраак сүрүн хайысхаларынан бэйэ дьыалатын, бэйэ кэтэх хаһаайыстабатын, судургутуллубут усулуоубуйан арыныахтарын  сөп.  Бу туһунан салҕыы Семён Матвеев кэпсээтэ:

"Бу сылга социальнай хантыраактар биир уларыйыылара диэн, ыарахан балаһыанньаҕа түбэспит дьон, кыаммат дьиэ кэргэннэргэ 6 социальнай пакетынан көмө оҥоһуллуоҕа. Манна хас биирдии киһи балаһыанньатын, олорор усулуобуйатын көрөн көмө барыаҕа".

Биирдэ бэриллэр харчынан көмө кээмэйэ 350 тыһыынчаҕа диэри буолуон сөп. Сайабылыанньалары куорат сиригэр олорор сирдэрин управаларыгар, социальнай харалта салалтатыгар, улуустарга - олохтоох дьаһалталарга бириэхтэрин сөп