Саха сиригэр сылгы кыстыга

Сылгыны иитээччилэр тыа сиригэр эрэ буолбакка, киин куоракка эмиэ бааллар. Туймаада хочотун Бүлүүлүүр суолугар, Неустроевтар дьиэ кэргэн аҕыйах сыллааҕыта сылгыны ииттэн саҕалаатылар.

Виктор Неустроев крестьянскай, фермерскай хаһаайыстыбалаах. Дьокуускай куорат таһыгар сылгы тутар сирдээх. Кини ыраас хааннаах саха сылгыларын иитэн саҕалаабыта 4 сыл буолбут. Бу курдук сыспай сиэллээхтэрин ойууртан булаттаан аһатар сиригэр илдьэр. 3 үөр сылгытын бэйэтэ дьиэ кэргэнинээн иитэр.

4 сыллааҕыта аан бастаан 5 саха сылгытын ылан иитэн саҕалаабыта. Онтон ыла сылгылара төрөөн-ууһаан уонна хас сылын ахсын эбии кыра-кыралаан атыылаһан билигин сылгытын ахсаана лаппа элбээн, бөдөҥ хаһаайыстыба буолан турар.

"Саха сылгытын кэпсээтэххэ, көстөрүнэн уҥуоҕунан намыһах, түүтэ уһун, атахтара эмиэ түүлээх буолар. Кыһыны тулуйумтуо, кинилэр төһө баҕар, хайдах баҕар тымныыга хаары хаһан аһыыллар уонн улахан тымныыга кыратык аһаталлар. Ол эрэн, бэйэлэрэ көҥүл сылдьаллар уонна кинилэр сымнаҕастар", - диэн сылгыһыт Виктор Неустроев кэпсиир.

Барыта эриэ-дэхси буолбат. Саҥа саҕалааччы киһиэхэ кумаахы, докумуон сүүрсүүтэ элбэҕэ, оттуур, мэччирэҥниир сир ылыыта ыарахаттардааҕа атахтыыр. Өссө да салҕыы сайдыахпын, сүрүн кыһалҕам сир боппуруоһа диэн кэпсиир. Билиҥҥи туругунан 7 сиргэ сайабылыанньа биэрдим да, эппиэт суох диэн  Виктор Неустроев этэр:

"Сир боппуруоһугар кылгастык эттэххэ, биһиги куоркакка МФЦ нөҥүө докумуоммутун  биэрэбиппит. Онно үксүн, архитиктураҕа тиийэн аккааһы ылар.  Сир сыһыаныгар эмиэ аккааһы ылар. Иннэ гынан, процедурата наһаа уһаан хаалар.  Биирдии сирбитин от охсуутугар иккилии сыл курдук оҥотторобут".

Манна эбии субсидия ылыыта эмиэ ыарахаттардаах. Холобур, былырыын киирсэ сатаабыт да хамыыһыйа, Дьокуускай куоракка олорор эбиккин диэн чугаһаппатах. Ол эрэн, санаатын түһэрбэт, быйыл эмиэ киирсэн көрүөм диэн кэпсиир. Киниэхэ сүрүн көмөлөһөөччүлэринэн оҕолоро уонна 88 саастаах  кэргэнин аҕата буолар. 

Быйылгы кыстыкка бүтүн өрөспүүбүлүкэ үрдүнэн 181 тыһыынча сылгы баар. Онтон 20 тыһыынчата  билиҥҥи тымныы кэмҥэ, эбии аһылыкка киирбит. Кыстык ортолоото. Былырыыҥыны кытта тэҥнээн көрдөххө, сыспай сиэллээх ахсаана 2 тыһыынчанан аҕыйаабыт, биэ ахсаана улахан уларыйыыта суох.

"Сайыҥҥы кэмҥэ даҕаны, ол иннинээҥҥи кыстыктарга даҕаны, окко кэккэ уустуктары көрсүбүппүт. Ол фактора оонньоото быһылаах, сорох дьон  отторуттан да сылтаан, сылгыларын тохтотоллор. Ити сылгы түргэнник хамсааччы, 2000 улахан таҥнары түһүү буолбата", - диэн СӨ Тыа хаһаайыстыбаҕа миниистирин солбуйааччы Николай Афанасьев иһитиннэрэр.

Сылгыһыттар  кыһыҥҥы кэмҥэ ордук түбүгүрэллэр. Төһө да ыарахаттар баалларын үрдүнэн, кинилэр сыспай сиэллээҕи элбэтэр соруктаахтар. Оттон биһиги геройбут Виктор Неустроев уратыта диэн, саха сылгытын элбэтиигэ санаатын уурар.