Саҥа "Кэрэни көрбүт"  диэн быыстапка арылынна

Национальнай ойуулуур-дьүһүннүүр искусство түмэлигэр саха киинэтигэр аналлаах быыстапка үлэлээтэ. "Кэрэни көрбүт" диэн ааттаах быыстапкаҕа "Не хороните меня без Ивана" киинэҕэ туттуллубут матырыйааллары, малы-салы, киэргэллэри, көстүүмнэри көрүөххэ сөп. Уус-уран киинэ сүрүн дьоруойун уобараһынан, Саха сирин идэлээх бастакы худуоһунньуга Иван Попов буолар. Онон быыстапкаҕа музей пуондатыттан Иван Попов суруйан хаалларбыт хартыыналарын, кини оччотооҕу кэмҥэ олорон ааспыт уус-уран оҥоһуктарын эмиэ көрдөрүүгэ таһаардылар.

"Манна "Саха фильм" урут туттубут таҥастарын туттан, эбии саҥалыы оҥорон, уларытан тутуннубут. 12 маастар үлэлээтэ. Аҕыйах да буолбуттарын иһин, кылгас кэм иһигэр, элбэх таҥаһы былыргылыы халыыптаах тиктилэр. Ис дууһаларын ууран туран үлэлээтилэр. Уонна бастатан туран, бу киинэҕэ 100 сыл аннараа өттүгэр оҥоһуллубут таҥастары-саптары көрдөрүөхтээх этибит. Үчүгэй хаачыстыбалаах таҥас матырыйаалын булуу уустук соҕус этэ. Иван Васильевич бэйэтэ хаалларбыт элбэх хаартыскаларын көрөн, үлэбитин салайтарбыппыт", - диэн Былатыан Ойуунускай аатынан Саха тыйаатырын худуоһунньуга Дария Дмитриева кэпсээтэ.

"Не хороните меня без Ивана" диэн киинэ улахан экраҥҥа ааспыт сыл ахсынньытыгар тахсыбыта. Уус-уран киинэ олоххо буолбут түгэҥҥэ олоҕурда. Манна бастакы идэлээх худуоһунньук Иван Попов уонна Степан Бресеков доҕордоһууларын туһунан кэпсэнэр. Хартыына норуоттар икки ардыларынааҕы уонна Россиятааҕы куонкурустар кыайыылаахтара.