Ис дьыала министиэристибэтэ 2022 сыллааҕы түмүгү таһаарда

Саха сирэ Уһук Илин регионнарга буруйу уонна ыар буруйу оҥорууга саамай намыһах көрдөрүүлэннэ. Урукку сылларга Өрөспүүбүлүкэ аһыы утаҕы иһэн баран ыар буруйу оҥоруунан Россияҕа 10 иһигэр киирэр эбит буоллаҕына, бу көрдөрүү быйыл 10% аҕыйаата. Барыта 13 тыһ. буруй бэлиэтэннэ, онтон киһи илиититтэн өлүү көрдөрүүтэ 1,3 % түстэ диэн Миниистир Владимир Прокопенко  эттэ. Маны таһынан, Саха Сирэ буруйу арыйыы көрдөрүүтүнэн, дойдуга 10 бастыҥ көрдөрүүлээх регионнар истэригэр киирдэ.

"2022 сыл уопсай түмүгүнэн, Нам улууһа Өрөспүүбүлүкэҕэ бастакы миэстэ буолла. Бу атын профильнай уорганнары, прокуратураны, суудтары, уопсастыбыннаһы, оройуон дьаһалтатын кытта бииргэ үлэлээн улахан ситиһиини туттубут диэххэ наада. Мин манна махталбын тиэрдиэм этэ, отдел тус састаабыгар уонна биһиги миниистирбитигэр Владимир Николаевич Прокопенкоҕа. Улахан үлэ барда", - диэн Россия ИДьМ Нам улууһугар салаатын начальнига Иван Емельянов бэлиэтээтэ.

Өлөрүү-өһөрүү, буруйу оҥоруу көрдөрүүтэ аччаабыт буоллаҕына, албыннатыы, түөкүттэргэ киирэн биэрии көрдөрүүтэ саамай үрдүк кэриэтэ. Күн-түүн өрөспүүбүлүкэ олохтоохторо харчыларын ытыс соттоллоро элбии турар. Ааспыт сылга дьон 250 млн. тахса суумманы түөкүттэргэ уган биэрдэ. Бу сыл саҕаланыаҕыттан, номнуо 10 кэриҥэ киһи харчытын мэлиттэ.