Нерюнгритааҕы куукула тыйаатыра

Тыйаатыр көрөөччүлэригэр саҥа сылга, үгүс саҥа туруоруулары бэлэмниир. Үлэ саҥалыы тыыннанан барара, элбэх былааны туруорара, тыйаатыр дьиэтигэр-уотугар өрөмүөн барбыта төһүү буолла.

Тыйаатыр биир тарбахха баттанар үлэһитэ Евдокия Гаулика саҥа үүммүт сыл, саҥа репертуарыгар, саҥа туруоруутугар бэлэмнэнэр. Кини Ганс Христиан Андерсен "Муус королева" остуоруйатын туруоруутугар сүрүн оруолу Герданы оонньуур.

Тустаах тыйаатыр 1985 сыллаахтан бэйэтин үлэтин саҕалыыр. Бастакы артыыстарынан Свердловскай театральнай училище выпускниктара ааттанналар. Онтон саха труппатын Федот Потапов уонна Зоя Багынанова тэрийэллэр. Ол кэмтэн ыла, тыйаатырга үгүс уларыйыылар ааһаннар, сылтан сыл аайы репертуара улаатан, бүгүн тыйаатыр Өрөспүүбүлүкэҕэ биир уһулуччу үлэлээх тэрилтэнэн ааҕыллар. Билигин манна сүрүн режиссёрунан Александр Иванов үлэлиир. Саҥа туруорууларын оройуон эрэ буолбакка, бүтүн Саха сирин көрөөччүлэригэр туһаайан туруорар.

"Испиктээкил туруораары сылдьабын. Оҕолорго көһө сылдьан көрдөрөргө. Кыра формалаах олоҥхо испиктээкили   биһиги актрисабыт Евдокия суруйбута", - диэн  Нерюнгритааҕы куукула тыйаатырын режиссёра, СӨ култууратын туйгуна Александр Иванов иһитиннэрэр.

Күн бүгүн тыйаатыр 50 үлэһиттээх, хас да салаанан үлэлиир. Манна биир бас-көс миэстэни бутафорскай салаа ылар. Бу тыйаатыр саамай сүрүн суолталаах сиринэн ааҕыллар. Уус Алдан Тандатыттан төрүттээх, идэтинэн худуоһунньук  Афанасий Аргунов илиититтэн   киһи сөҕө көрөр куукулалара чочуллан тахсаллар. Хас биирдии куукулаҕа үлэһиттэр дууһаларын ууран туран үлэлииллэрэ өтө көстөр. Хата, билигин үлэбит арыый эмэ чэпчээтэ диэн Афанасий Гаврильвич санаатын үллэстэр. Онно төһүү - саҥа үлэ матырыйаала.

"Урут параллонунан оҥоһуллар этэ. Онтон быйылгы сылтан эваҕа көстүбүт. Тоҕо диэтэр, паралоннааҕар икки-үс төгүл ыйааһына чэпчэки. Оҥоһуллара да чэпчэки уонна түргэн. Уонна кинини хайдах  баҕар ититэн баран кырааскалыыгын", - диэн Нерюнгритааҕы куукула тыйаатырын худуоһунньук -туруорааччыта Афанасий Аргунов кэпсиир.

Тыйаатыр материальнай-техническай баазатын сыллата саҥардар. Туох баар бырагырааммаларга кыттар. Былырыын сыана саҥа сабыытын сахалыы моһуоннаах гына уларыппыттара. Ону таһынан,   кыра көрөөччүлэргэ анаан, саҥа олорор миэстэлэри оҥотторбуттара.  Доруобуйаларын туругунан хааччахттаах дьоҥҥо анаан пандус туруоруллубута, уот-күөс, тыас-уус өттүгэр эмиэ саҥардыы буолла. Бу барыта салайааччы сүүрэн-көтөн туруорсуута буолар.

"Үүммүт 2023 сылга улахан өрөмүөн буолуохтаах. Бу дьиэбит 1985 сыллаах тутуу. Эргэрдэ, элбэх итэҕэстээх. Ону ситэриэхтээхпит. Саалабыт муостатын, фойены, үһүс этээскэ улахан паркетнай саалабытын оҥоруохпут, иккис этээскэ баар кыра сааланы  театральнай саала курдук оҥорор бырайыактаахпыт", - диэн  Нерюнгритааҕы куукула тыйаатырын дириэктэрэ, СӨ искусствотын үтүөлээх диэйэтэлэ Пётр Скрябин сырдатар.

Онон саҥа улахан өрөмүөнү кытары - тыйаатыр үлэтэ өссө тупсуоҕа, сайдыаҕа