ОҺуохайга - болҕомто

ОҺуохайга - болҕомто. Норуоппут сүдү баайа, саха норуотун бастыҥ үнкүүтэ былырыын алтынньы ыйга Россияҕа култуурнай нэһилиэстибэ быһыытынан сыаналаммыта. Саха норуотугар бу үрдүктүк өрө тутуу, билинии бэлиэтэ. Бу күннэргэ нациольнай бибилиотекаҕа  улахан сүбэ мунньах ыытыллынна. Кэпсэтиигэ учуонайдар, оһуохайга уһуйаачылар, дархан этээччилэр бэйэлэрин санааларын үллэһиннилэр.

Саха норуота былыр былыргыттан илдьэ сылдьар оһуохай үнкүүтүн харыстаан, инникитин өссө хайдах сайыннарарга диэн бэрт киэн ис хоһоонноох кэпсэтии таҕыста. Тыл, ырыа, хамсаныы бу барыта бииргэ дьүөрэлэһэн ураты көстүүнү үөскэтэр. Оһуохай саха итэҕэлин кытта сибээстээх, эмтиир күүстээҕэ эмиэ биллэр. Төрүт үҥкүүбүт суолтатын, уратытын бэлиэтиир тыыннаах дакылааттары бу күн кыттааччылар билиһиннэрдилэр.

Республика духуобунай уонна култуурнай олоҕор Олоцхо, оһуохай сүрүн миэстэни ылар. Ил Дархан Айсен Николаев олоҥхоһуттарга, оһуохай этээччилэргэ уонна тимир уустарыгар стипендия анаабыта. Бу эмиэ үрдүктүк сыаналааһын уонна билинии бэлиэтэ буолар.

Уус-Алдан улууһуттан сылдьар биллэр оһуохайдьыт Семен Черноградскай төгүрүк остуолга кэлэн бэйэтин санаатын үллэһиннэ. Саха норуота төрүт култууратын харыстаан, сөргүтэн кэлэр көлүөнэҕэ утары уунар төрүт баайдаах диэн үөрэ кэпсиир.

Түмүккэ кыттааччылар оһуохай сайдар суолун тобуларга былаан, сүбэ-соргу ылыннылар. Дьиҥнээх төрүт култуурабытын үйэтитэр, сайыннарар туһунан, бары биир санаанан түмсэн үлэлэһиэхпит диэн сорук туруордулар.