Тохсунньу тымныытын содула

29

Бу күннэргэ үлүйүү ахсаана элбээн, ожоговой киин ыарыһахтарынан туолан  турар. Билигин 50 миэстэллээх балыыһаҕа, 89 киһи эмтэнэ сытар. Учуонайдар этэллэринэн, быйылгы кыһын инники сыллары кытта тэҥнээн көрдөххө, ичигэс.

Саха сиригэр тоһуттар тымныылар турбуттара хаһыс да нэдиэлэтэ буолла. Ол курдук, бу күннэргэ тымныйан, үлүйэн балыыһаҕа көрдөрбүт киһи ахсаана эмискэ элбээн, Өрөспүүбүлүкэтээҕи 2 нүөмэрдээх балыыһа ожоговой киинигэр ыарыһах ахсаана элбээтэ. Манна киин куораттар эрэ буолбакка, араас улуустартан кэлэн эмтэниини ааһаллар.

Өскөтүн, тымныйан үлүйэр түгэннээх буоллаххытына, эбэтэр үлүйбүт дьону буллаххытына, быраастар сүбэлииллэринэн, илиини-атаҕы мээнэ хамсатыман.  Уонна сүрүнэ, массаж оҥорор көҥүллэммэт. Тоҥмут тымырдар, каппилярдар алдьаныахтарын сөп. Онон үлүйбүт киһини аа-дьуо хос температуратыгар сытыаран сылытыахтааххыт, итии ууну туттар бобуулаах диэн Өрөспүүбүлүкэтээҕи 2 №-дээх балыыһа суһал көмөнү оҥорор киинин  иһэлийиини эмтиир киин ординатор-бырааһа Семён Алексеев этэр:

"Бастакынан, тоҥмут киһини дьиэҕэ киллэрэҕит. Массажтыа суохтааххыт, халыҥ таҥаһынан таһыттан бүрүйэҕит уонна итии чэй, кофе биэрэллэр. Ол кэнниттэн фелдьшеры, эбэтэр бырааһы ыҥырыахтааххыт".

Оттон учуонайдар этэллэринэн, бүтэһик 30 сылга климат сылыйыыта бара турар. Дьон кыһыннары 30 кыраадыс тымныыга үөрэнэн хаалбыттар.  Былырыын тохсунньу ый орто тымныытын кээмэйэ 44,5 кыраадыска тэҥнэһэр эбит буоллаҕына, быйыл саҥа дьылтан саҕалаан тымныыбыт орто кээмэйэ 43 кыраадыска тэҥнэһэр. Ол аата былырыын лаппа тымныы эбит.

Саха сирин төрүт тымныылара инникитин курдук өр кэмҥэ турбат буоллахтарына, бу курдук биирдэ эмит күүскэ тымныйан, бэйэтин биллэрэр. Учуонайдар бэлиэтииллэринэн, бүтэһик сылларга сылаас, сымнаҕас кыһыннар тураннар, дьон түргэнник тымныыны умнубут. Биирдэ эмит тымныйан ыллаҕына, соһуйаллар дииллэр.

Өр кэмнээх тымныылар Саха сиригэр тураллара, дьиҥэ, туох да дьиктитэ суох. Сөпкө таҥнан, дьаһанан сырыттаххытына, дойдубут төрүт айылҕатын көстүүтүн, аам-даам тымныытын этэҥҥэ туоруохха сөп